Repertorio Etimologico Piemontese

Che gòj, che gòj! Che gòj ch’a sia surtije giusta për le feste (e che regal ch’a l’é da fé, nen mach për chi a l’ha a cheur ël piemontèis) col ch’a l’é un gròs travaj, stàit un viage për na bela partìa d’agn: squasi vint. A s’ëntìtola «Repertorio Etimologico Piemontese» (o pì curt, «REP»), a l’han cudilo studios bin anciarmà sota la diression d’Anna Cornagliotti, che ant soa presentassion pien-a dë siensa lenghistica e bibliografica, a scriv dl’«irrinunciabile» realisassion «di un nuovo dizionario etimologico piemontese che abbinasse il rigore scientifico della ricerca degli etimi alla facilità di consultazione e lettura». E donca ‘n dissionare për tuj, pròpe për tuj e nen mach për chi a tavaja ant l’ambient e ‘nt ël setor. Na parleroma ‘ncora, përchè intré ant le paròle piemontèise con la curiosità e ‘l gust ëd savèj da doa a ven-o e che viage a l’han fàit ant ël temp a l’é n’arserca mai finìa. Torno a dì: na parleroma pì ‘ncreus d’àute vòte. Ma për ora important a l’é dé le informassion ch’a conto për trovelo. 1620 pagine stampà da l’Artistica ‘d Savijan për cont ëd chi, giutà da la Region Piemont-Assessorà a la Cultura, a l’é fass-ne levatriss: la Ca dë Studi Piemontèis (via Ottavio Revel 15, Turin; tel. 011/537486; info@studipiemontesi.it). N’istitussion che tra ij tanti mérit a gionta ‘dcò cost: n’aventura dle pì bele, pì anciarmante e decisive. ëd Giovanni Tesio - da TORINOsette dLa Stampa dj'8 ëd gené dël 2016

Indietro