Fomne a lë specc

A i é – pen-a surtìa – na sèrnia ‘d conte tute quante feminin-e che Guido Davico Bonino a l’ha pubblicà adess adess da Rizzoli (Bur) con ël tìtol «Donne allo specchio» (pp. 812, euro 16,50). Conte, bin intèis, an italian, ch’a van da la forlan-a Caterina Percoto a la bolognèisa-milanèisa Mura. A son na quinzen-a: doe o tre piemontèise con tute bon-e rason e cheidun-a passà an chèich manera da nòstra region o da nòsta capital regional (bastrìa pensé a Annie Vivanti, ch’a l’é mòrta a Psè, o la Marchesa Colombi, ch’a l’é mòrta a Turin). Tutun, le doe pì piemontèise a son Carolina Invernizio e Amalia Guglielminetti. Daré ‘d lor tut un mond gropà a soa «couleur locale» e nen pòch tocà dal piemontèis ch’as les tra le righe. Lòn ch’an fa mnì ‘n ment cheicòs che forse nen tuj a san. Veuj dì che Carolina Invernizio a l’ha ‘dcò scrit un romans an piemontèis, «Ij delit ëd na bela fija» publicà ant j’edission Viglongo: un cit romans popolar; un romans curt che a la dis longa an sle custion regionaj e locaj che la lenga italian-a a l’ha dovù ten-e da ment ant soa formassion nassional. E sòn a val nen mach për ël piemontèis se ambelessì pudrìo fé – për d’àute region – ij nòm dla Percoto, dla Marchesa Colombi, dla Deledda, ‘d Maria Messina. ëd Giovanni Tesio - da TORINOsette dLa Stampa dij 27 ëd novèmber dël 2015

Indietro