J'Esposission a Turin

L’oma vëdune ‘ncheuj dle meravije!/ Eben, còsa na dis dël liberty?/ A chërdlo pròpi che da tut sossì/ a peussa seurt-je d’òpere riussìe?/ Mi i na son entusiasta, e francament/ lo treuvo bel original e fin…/Ah! L’Arte Neuva coma ch’a s’impon! /Che grandëssa, che slans, che sentiment!/ Còsa na dis?..A-ah!..Doi tajarin/al sugo..? Ma sicura! A l’ha rason!». A l’é në s-cianchèt, irònich e dissacrant coma a l’era ant sò stil, da un dij sonèt che Arrigo Frusta a l’ha publicà për la «Prima Esposizione d’Arte Decorativa Moderna», tnusse a Turin dël 1902. Cost volumèt, ansema a col dij sonèt birichin, sempre ‘d Frusta, publicà për l’Esposission dël 1898, a l’é an giojera, ansema a tanti bej libèr, tassin-e, piat, midaje, tilèt, quader, cartolin-e, document (a peu pre pì ‘d dosènt tòch) fin-a al 25 dë stèmber a la Biblioteca dla Region Piemont, via Confienza 14, a Turin, për la mostra, soagnà da la Ca dë Studi Piemontèis: «Torino internazionale. Le grandi EXPO tra Otto e Novecento». Na mostra ch’a veul arcordé cole Espossion turinèise (dal 1805 al 1961), ch’a l’han portà la sità e ‘l Piemont a l’atension antërnassional. Vardé a nòst passà për pensé nòst avnì. L’esposission a l’é compagnà da un bel catalogo publicà dal Consèj regional dël Piemont. Për visité la mostra as paga gnente; anformesse për j’orari allo 011/5757371; opura vardé ‘l sit dël Consèj www.cr.piemonte.it, ch’a smon fin-a na visita virtual; o consulté ‘l sit dla Ca dë Studi Piemontèis www.studipiemontesi.it. d'Albina Malerba - da TORINOsette dLa Stampa dij 26 ëd giugn dël 2015

Indietro