Folk Festival-Reis

Duminica 21 giugn a Sant Stevo (Santo Stefano Roero) an piassa Santa Maria del Podio a parte da ses e mesa (dël press-disné) la sconda edission ‘d col ch’a së s-ciama «Folk Festival-Reis», doa a canteran e a baleran ij grup dël Roé (e nen mach) con soe bele denominassion piemontèise: «Fòra ‘d tua», «Canalensis Brando», «Cotin e ghete», «Binele Folk», «Ij Musicant d’Alba», «La Crica dij Mës-cià», e peuj la gionta ëd j’«Element da Piòla» (ch’a son ëd Racunìs) e ‘l gran final con ij «Tre Martelli» (ch’a son ij pì arconossù). Nen mach canson e balade ma – as capiss – mangé e bèive ch’a peulo nen manché (piat e vin dla tèra ‘d Sant Stevo, prudutor e Pro Loco ansema). Ma lòn ch’an fa pì piasì ambelessì a l’é n’inissiativa galupa, ch’a së s-ciama «Piantaparòla». As trata ‘d manten-e ‘n vita paròle piemontèise ch’as deuvro pì nen o squasi pì nen. Corrado Quadro a l’ha sernune ‘n nùmer e a chi a na sernerà un-a tra coste e a s’angagerà për dovrela e fela dovré a l’avrà ‘n regal na piantin-a ‘d rol dle Ròche për testimonié che le paròle a van cudìe come piantin-e se vuroma che ‘l mond che vivoma mincadì (s’a l’é cit a l’é pa ‘n delit) a manten-a almeno na frisa ‘d cola memòria ch’a l’é stòria e geografìa e tut ansema siviltà. E bon pro. ëd Giovanni Tesio - da TORINOsette dLa Stampa dij 19 ëd giugn dël 2015

Indietro