L'italia a pezzi

A s’ëntìtola «L’Italia a pezzi» e as sot-tìtola «Antologia dei poeti italiani in dialetto e in altre lingue minoritarie tra Novecento e Duemila». A l’han cudila Manuel Cohen, Valerio Cuccaroni, Giuseppe Nava, Rossella Renzi, Christian Sinicco. A l’ha publicala Gwynplaine edizioni ‘d Camerano (Ancona). A son 748 pàgine e a costa 20 euro. N’Italia a tòch e tochèt, fàita ‘d poesìa an tute le parlade e s-ciapà an doe part. Prima j’autor nà ant j’agn tranta e quaranta e peuj coj nà dal sinquanta an sù. Tanti ij nòm, pòchi j’ëstrument për dëscheuvre dë strà. Disoma ‘n repertòri bin fosonant, ma nen tròp giudissios. Combin tut a fassa, forse a sarìa ora ‘d fé – pì che ‘n censiment – un pòch ‘d sèrnia. Tutun, lamentom-se nen. Mej parèj che gnente. E vardand al Piemont? I trovoma Remigio Bertolino, Bianca Dorato, Dario Pasero, Annamaria Balossini, Michele Bonavero, Nicola Duberti. Ch’a l’é cheicòs e, tut somà, fin-a giust, përchè ‘d vos pròpe neuve a më smìa gnanca a mi ch’a-j na sia tante ‘n gir. Për mè cont, i penso che ij valor sicur a son tra coj dla prima anfornà. J’àutri a l’han damanca ‘d conferma. Ma sòn – gnun-e colpe – mach ël temp a pudrà dé sò giudisse. ëd Giovanni Tesio - da TORINOsette ëd La Stampa dij 16 ëd gené dël 2015

Indietro