Armanach e Calendari 2015

L'Epifanìa tute le feste a l'é portasse via, e i soma torna sì. Mentre a tuti arnovoma j'auguri con tut cheur për ël 2015, segnaloma j'armanch e ij calendare ch'an compagneran tut l'an an piemontèis. "La memòria dël temp" (Editrice Il Punto Piemonte in Bancarella), sempe 'l prim a fé babòja ant le giojere, mentre fòra a arbat ancor ël sol: bele fòto d'antan, test an italian e an piemontèis ëd vàire colaborator, paròle d'overtura 'd Bruno Gambarotta, proverbi, sant e di an piemontèis. "A-i era na vòta la Diatto", a l'é l'Armanach soagnà da Sergio Donna për le edission "Ël Torèt/Monginevro Cultura": con j'articoj sla stòria dla Diatto, 'd Gambarotta, Sergio Donna, Luigia Casati e Giovanna Sorrentino, e la canson "Nìvola 'd corsa" 'd Beppe Novajra, ispirà a la Diatto 'd via Frejus e a soe imprèise sportive; na bela partìa 'd fòto stòriche dle viture; e peui pì 'd tërzent proverbi an piemontèis, ij Sant e ij patron ëd le sità e dij pais dël Piemont. Parland d'Armanach/lìber, sitoma, ma i l'avroma ocasion ëd presenteje da bin: "Ij Brandé. Antologìa 'd poesìa e pròsa piemontèisa 2015", A l'Ansëgna dij Brandé, n. 56, soagnà da Michel dij Bonavé, che ant la prima part, a diverse vos, a rend omagi a Arrigo Frusta, scritor, poeta, giornalista, alpinista, un dij protagonista dël cine a Turin, a 50 ani da soa mòrt. E da la provincia 'd Coni, sempe anteressant "'L tò Almanach", publicà da Primalpe, con ansema "'L tò Almanach dei ragazzi". Bon-a letura! d'Albina Malerba - da TORINOsette ëd La Stampa dij 9 ëd gené dël 2015

Indietro