Vittorio Sivera

Coma ant na sena teatral, l’ator e scritor piemontèis Vittorio Sivera a l’ha lassà ‘l teatro a l’improvis pròpi ‘l di ‘d Natal. Ël teatro, ël teatro piemontèis, a l’é stàita soa vita, soa passion, soa vos, sò travaj, sò angage. Come ator, protagonista ‘d tante stagion, a parte da soa sità, Cambiagn, dova a l’é stàit tra ij fondator e animator dël Teatro Serenissimo, a savìa anciarmé con soa presensa: a sarà për soa autëssa (grand e màire), a sarà për cola verve ch’a jë s-ciodìa quanda as durbìa ‘l sipari, ma col monsù d’antant, ch’a smijava fin-a genà ant ël cotidian, an teatro a l’avìa na sòrt ëd gigèt, combin ch’a fèissa ‘dcò teatro ampegnà. Da j’ani Sinquanta dël Neuvsent fin-a ai sò ùltim di, a l’ha virà tut ël Piemont con ij sò spetàcoj. Tut àutr che secondari ij test teatràj ch’a scrivìa an piemontèis e an italian. Ambelessì i arcordoma mach doi tìtoj, ch’a son stàit segnalà e publicà për ël concors teatral pì avosà, ‘l «Premio per un testo teatrale nelle lingue del Piemonte» dla Region Piemont: «Magalì. Ël doss bërgé», doi temp con mùsiche e balèt scrivù a quat man con Barba Tòni Bodrìe, ël poeta ‘d Frassino Antonio Bodrero (Ca dë Studi Piemontèis, 1999); e «La reusa bianca», pièce stòrica an doi at (sempe për la Colan-a dla Ca dë Studi, 2011). Da lese e da nen dësmentié. d'Albina Malerba - da TORINOsette ëd La Stampa dij 17 ëd gené dël 2014

Indietro