Ij Brandé 2014

L'an a va vers la fin e pontual al rendevó a l'é rivaje Ij Brandé 2014, l'armanach/antologìa literaria fondà dal poeta ch'a l'ha arnovà tuta la poesìa dël Neuvsent an lenga piemontèisa: Pinin Pacòt. E "Ij Brandé 2014" ("gli alari", ch'a ten-o anvisca la fiama përchè as dëstissa nen) a son nen sta vira mach la sòlita antologìa, përchè na bon-a part dël volum a l'é dedicà pròpi a la memòria 'd Pinin Pacòt për arcordé che ant ël 2014 a son 50 ani da soa mòrt. Na sernia 'd contribù inèdit e tuti anteressant për smon-e a la comunità djë studios e dj'apassionà j'aspet meno conossù dël grand poeta. Tut sòn a fà 'd cost nùmer dij Brandé n'edission soassìa, ràira e pressiosa. Pì spèss, pì bel e pì soagnà për tuti ij Piemontèis ver. Da nen perde. A l'ha publicalo l' Editriss Il Punto- Piemonte in Bancarella (tel. 011/2238112; sit http://www.piemonteinbancarella.it; 10 euro). As peul trovesse ant le librerìe ch'a ten-o ij lìber piemontèis, e as peul ëdcò trovesse a la Ca dë Studi Piemontèis, an via Revel 15, fin-a al 21 dë dzèmber, për l'esposission "Un libro per Natale" (orari: 9/12; 15/18; saba 21: 9/18; tel. 011/537486). E con la vos ëd nòst poeta a tuti ij letor auguroma bon-e Feste e un 2014 an piòta. Alégher! d'Albina Malerba - da TORINOsette 'd La Stampa dij 20 dë dzèmber dël 2013

Indietro