La memòria dël temp

N'ani a l'é già squasi volasne vìa, e a l'é torna temp d'armanach. Ant la fiusa (o l'ilusion!) che l'armanach 2014 a marca nen patele, i segnaloma 'l prim ch'a l'ha portane la scalëtta dël neuv ani: "La memòria dël temp. Calendari piemontèis për le sità e ij sitadin 2014", publicà, ormai da na bela partìa d'ani, da l'editriss Il Punto/Piemonte in Bancarella (tel. 011/2238112; info@editriceilpunto.it), che da otóber a l'é an distribussion, e a l'é già rivà fin-a ant le ca dij piemontèis d'Argetin-a. Al Calendari 2014, ch'a l'ha guernà soa impostassion e impaginassion, tra bele anciarmante fòto d'antant, articoj curios dë stòria e 'd crònaca, le fnestre dij proverbi (gené a në smon an overtura un bon propòsit: "na parloma a bòce fërme"; a mars i lesoma già che a l'é "coma ciucé 'n ciò"; ma anans, "lamentose nen ëd gamba san-a"), ij dì e ij mèis con ij sò Sant an piemontèis, a l'han colaborà Bruno Gambarotta, Camillo Brero, Michele Bonavero, Claudio Santacroce, Beppe Lachello, Massimo Montà, Piero Bianchi, Walter Ferreri per le "lun-e", e peui ancora test ëd Gustavo Mola di Nomaglio, Maria Tarditi, Mariano Tomatis, Beppe Valperga, Margherita Fumero, Massimo Centini. Mèis da dësfojé e da lese, e a la fin…da ten-e an biblioteca. d'Albina Malerba - da TORINOsette 'd La Stampa dij 6 dë dzèmber dël 2013

Indietro