Giovanni Faldella

A propòsit 'd piemontèis, stavòta veuj parlé d'un piemontèis doc ch'a l'é stàit Giovanni Faldella (1846-1928), përchè n'editor milanèis (Greco) a l'ha pen-a publicà, cudì da Danilo Laccetti, un dij sò lìber pì susnos ch'a s'ëntìtola "Un viaggio a Roma senza vedere il papa". Përchè parlene? Për doe rason. La prima për dì che soens as fa d'edission ch'a l'é nen ël cas. Con tut che costa a sia bin cudìa, përchè fela se la Ca dë Studi Piemontèis a l'avìa già fane un-a cudìa da Pier Massimo Prosio (j'editor a van për sò cont ma ch'as lamento peuj nen se a van pì che na vòta a ramengo). Noi stoma a l'edission dla Ca dë Studi (anvitand ij nòsti letor a sërchela). La sconda rason a l'é che Faldella - gnanca a dilo - a l'ha nen mach scrivù an italian ma 'dcò an piemontèis, bin atent al teatro e a l'arnassita dël teatro classich-modern ëd Pietracqua, Garelli, Zoppis, Bersezio. E 'd sò a l'ha scrivù na comedia, "Un bacan spiritual", che sempe la Ca dë Studi a l'ha publicà cudìa da Caterina Benazzo. Na comedia ch'a buta an sena na rusa - bin presenta a jëslusse tra catòlich e nen catòlich - tra 'n parco e 'n sindich ch'a batajo pa mal. Bin lontan dal temp 'd papa Fransesch, binintèis. ëd Giovanni Tesio - da TORINOsette 'd La Stampa dij 29 ëd novèmber dël 2013

Indietro