Nicola Duberti

A l'é pen-a surtìe për le edission dla Ca dë Studi Piemontèis, Colan-a 'd Leteratura Piemontèisa Moderna, un cit ma soasì lìber ëd poesìe 'd Nicola Duberti, "J'òmbre 'nt le gòmbe/Le ombre nelle valli. Poesie nelle parlate monregalesi di Viola e del Kje", con prefassion ëd Giovanni Tesio e la pòstfassion d'un dij poeta monregalèis pì avosà, Remigio Bertolino (pp.60, 7 euro; info@studipiemontesi.it). Nicola Duberti a l'é 'dcò chiel dël Mondvì e a scriv sla carsà fiamenga dla tradission poetica 'd cole tere, tant ch'as peul parlesse 'd na "scòla monregalèisa", con na soa ispirassion genìta e na lenga localissà ant ël pais dij sò, Viòla, ant l'àuta Val Mongia. A son vers s-ciass e ancreus che come "un gioco di specchi - a scriv Bertolino - introiettano la realtà esterna e ne fanno grumi psichici, svelamenti crudi e folgoranti". D' "ascetica misura", a parla Giovanni Tesio, d'un lìber "di bellezza notevole, di anfrattuosa verità". Na poesìa, cola 'd Duberti, ch'angagia 'l letor a confrontesse con soe emossion pì ancestraj; ch'as vëda 'l poemèt sël luv: "Còs o l'é un lov o j'é neun ch'o lo sacia/ O sciòrt ëd neucc. Ti peu nent vaglo/…". Për chi a l'é nen tròp sensìbil a la poesìa a peul anteressé 'l léssich: paròle 'd finagi tra Piemont, Liguria, Provensa. d'Albina Malerba - da TORINOsette 'd La Stampa dij 22 ëd novèmber dël 2013

Indietro