Mzure da vin

Domenico Vineis a l'é 'n brav "cultor dla materia", coma ch'as dirìa ant un piemontèis na frisa rangiotà. N'apassionà 'd gust ch'a ten ëdcò ij sò cors a l'Università Popolar. Giusta chiel a l'ha pensà 'd buté 'nsema - an temp ch'a tiro pa mal an materia - 'n tilet bin cudì (e publicà sota l'ansëgna dl'"Ottica Grava", che a Turin a vend uciaj 'n via Madama Cristina 9). Un tilèt ch'an parla dle mzure da vin e ch'a l'é 'ntitolà con na cita malissia "Mzure da ciuciavin". E parèj, basta fene mension: na tin-a, un botal, na damigiana (o damigian-a), na brinda, un botalin, na damigiana (o damigian-a) a nòrma CE, na sigèla, un sigilin, un pinton (o 'n dobi), un pinton "marsalin", un botion, na pinta, na bota stopa a nòrma CE, na bota stopa, un mes lìter, na mesa stopa, un canon (o 'n tubo), un quartin, un cassul, un quintin, un bicer, un dil, un bicerin, un dial, na làcrima, na stissa. La diferensa tra bota stopa CE e bota stopa 'd na vòta a fa na cita diferensa (0,75 lìter la prima, 0,72 la sconda). Pì gròssa la diferensa tra na damigiana CE (34 lìter) e na damigiana d'antan (54 lìter). Na sigèla a fa 15 lìter e 'n sigilin da 6 a 12. Ma tut ël bel a l'é pa ant la mzura. A l'é ant l'ideja. ëd Giovanni Tesio - da TORINOsette 'd La Stampa dël 1m ëd novèmber dël 2013

Indietro