Amemanera

Quand ch'as parla 'd piemontèis, sovens a smija che 'l sagrin, la polemica, le ròbe ch'a van nen, a sìo lòn che pì a angagio chi a l'ha a cheur nòsta lenga e nòste tradission. Se da part a l'é vera ch'i vivoma 'd temp gram, da l'àutra a venta avèj la veuja d'andé a dësnicé le energie neuve ch'a fiorisso, magara un pòch stërmà. La gòj 'd trové 'd giovo, che a ciancio nen ma a fan, minca tant a càpita. Parèj ant na riunion a Monasté, për la Festa dël Piemont, i l'hai 'ncontrà Marco Soria e dëscuvert un cd neuv noviss motobin piasos. "Amemanera", ch'a sarìa "a mia manera", "a modo mio": des canson, ch'a mës-cio test tradissionaj piemontèis, elaborà e rangià con un gran bel ghëddo, con gigèt, e test neuv scrit e musicà da l'istess Soria. La vos fiamenga a l'é 'd Marica Canavese. "Le melodie sedimentate nella memoria famigliare - a scrivo - si rigenerano attraverso l'entusiasmo della riscoperta, sempre rispettosa della cultura e della gente che le ha create, fondendosi con colori e portamenti d'oltreoceano". Ansema a lor a son-o: Claudio Rossi, Greg Cohen, Massimo Scoca, Carlo Gaudiello, Elio Rivaghi, Guido Guglielminetti, "Older" Grassi, Lorenzo Alberti, Massimo Marenco, Nino Aresca. Ij test dla plachëtta a son an piemontèis, con tradussion an italian e an inglèis. Anformassion: http://www.amemanera.com; mailto:info@amemanera.com. d'Albina Malerba - da TORINOsette 'd La Stampa dij 27 dë stèmber dël 2013

Indietro