Claudio Salvagno

Ël premi "Salvo Basso-Città di Scordia", a l'edission ch'a fa ondes për un lìber ëd poesìa "edita in tutti i dialetti d'Italia", st'agn sì a l'é 'ndait a Claudio Salvagno për sò lìber "L'autra armada" publicà da Nino Aragno. Piemont ch'as fa onor ant un premi ch'as ten ant un-a sitadin-a dla provincia 'd Catania. Dedicà a 'n poeta come Salvo Basso ch'a scrivìa an sicilian (premi vorsù da la famija e da la sità apres ëd soa mòrt), ël Basso (sconda edission) a l'era già 'ndait a Remigio Bertolino e ora - squasi 'n miracol ai dì d'ancheuj che tute le inissiative colturaj a stento a salvesse - a l'é 'ndait a Salvagno, ch'a scriv an soa parlata ossitan-a 'd Bërnes, a l'intrada dla Màira e dla Gran-a. Coma d'àutra part a l'han fàit 'd vòte - travajand tra doi finage - Tavio Còsio o Barba Tòne o Bep Ross (ma dësmentrìa nen le tante paròle ossitan-e ch'a l'ha mëssonà për soa poesìa bin piemontèisa Bianca Dorato). Tut për dì che 'n poeta come Claudio Salvagno a l'é vreman 'n poeta, rich nen mach d'un-a passion lenghisticament anciarmanta, ma d'un-a ràira fòrsa lìrica ch'a-j ven da la memòria dij nòm, dle còse, dij përsonage, dij paisage. Un poeta che dla vita a fa poesìa e dla poesìa vita. ëd Giovanni Tesio - da TORINOsette 'd La Stampa dij 24 ëd magg dël 2013

Indietro