Asar

Ij seugn corsar.../A-j pòrta via/na pcita ramëtta/fiorìa,/campà a l'asar/lontan da la nita/an sl'eva corìa". A son vers dël poeta Tavo Burat, ch'i sito për parlé 'd la paròla "asar", dont i son trovame a discute ant na lession dij cors ëd piemontèis. Asar, dai vocabolari i trovoma la tradussion, "caso, ventura, sorte, rischio, accidente, azzardo"; e le relative manere 'd dì: për asar, buté a l'asar, as dà l'asar ch'a-j pija mal (avviene che si senta male, dal Gribaud); e peui a-i é la pì curiosa "n'asar" (che tanti a penso ch'a sìa scrita tuta tacà "nasar"): n'asar!", "si capisce, lo sapevo, ci avrei scommesso che", ch'as dòvra për dì 'd chijcòs che un a së speta, ch'a pudìa nen andé che parèj, dël tipo, "n'asar ch'a sarìa nen vnù!". E a cost propòsit Michel Pont, ch'i ringrassio, an conta ch'a l'ha sentù conté, che la manera 'd dì "nasar" a vnirìa dal nòm d'un pilòto motobin an piòta, Felice Nazzaro (Torino 1881-1940), colaudeur a la Fiat, ch'a vagnava tute le gare automòbilistiche, e quand la gent a ciamava "chi a l'ha vagnà la corsa?", la rispòsta a l'era sempe la midema: "Nasar". Ch'a sìa coma a sìa, miraco i savroma mai coma a l'é 'ndaita, ma 'd sicur asar a l'é na bela paròla dle nòste, sgnora 'd noanse e 'd significato, e n'asar o nasar voroma lassela meuire? d'Albina Malerba - da TORINOsette 'd La Stampa dij 3 ëd magg dël 2013

Indietro