Papa Fransesch

A l'é stàita n'emossion granda cola ch'i l'oma provà pòchi di fa për l'elession dël Papa Francesco, l'argentin piemontèis Jorge Mario Bergoglio. Un nòm ch'a dis ciàir soa nassita da na famija d'emigarnt: an Argentin-a da Brich Marmòrito 'd Pòrtacomà. N'emossion pì fòrta ...përchè ant un piemontèis argentin a-i é tuta nòsta gent che là a l'han travajà e con sò sacrifissi e sudor a l'han costruì un pais neuv, goernand s-ciass an cheur la patria cita. E a noi as sento gropà, i podrìo an serte moment fin-a dì che adess a son lor ch'an fan scòla d'identità e d'orgheuj, d'amor al Piemont sensa gene. Pen-a lansà la neuva, subit an sla ragnà a son partì ij message con ij nòsti amis argentin con l'arciam a la poesìa 'd Nino Costa: "Rassa nostran-a/Ai Piemontèis ch'a travajo fòra d'Italia": gent ch'a "parlo pòch, ma a san còsa ch'a dìo:/bele ch'a marcio adasi, a van lontan./… Gent ch'a mercanda nen temp e sudor:/- rassa nostran-a libera e testarda -/ tut ël mond a conòss chi ch'a son lor/ e, quand ch'a passo... tut ël mond ai guarda/… Tut ël Piemont ch'a va cerchesse 'l pan, tut ël Piemont con soa parlada fiera,/che 'nt le bataje dël travaj uman/a ten auta la front... e la bandiera". Vers pì s-cèt e sentì, gavà da le preghiere e dal bin, podrìo nen pensé për cost Papa che da soe rèis an tèra piemontèisa a na tèra lontan-a, a ancamin-a adess sò rosari ant ël mond. d'Albina Malerba - da TORINOsette 'd La Stampa dij 22 ëd mars dël 2013

Indietro