Carlo Giovanni Casalis

Un merit ëspecial a l'han sempe le arserche ch'an buto an condission ëd conòsse mej j'autor dla nòsta literatura, combin che për la literatura (an general) a sìo nen temp bon. Stavòta veuj sité 'n bel travaj publicà ansima l'ultim nùmer dl'arvista "Studi Piemontesi" (dzèmber 2012, pp. 473-481). A l'ha scrivilo Marco Marchetti e a s'ëntìtola "Uno scrittore moncalierese: Carlo Giovanni Casalis (1768-1846)". Pòch as savìa 'd n'autor come 'l Casalis, nà a Moncalé e mòrt al Niclìn, e col pòch a l'avìa sgatalo Renzo Gandolfo publicand-ne l'euvra pì susnosa, "La festa dla pignata". Cheicòs d'àut Fransesch Rubat Borel, publicand le "Fàule". Ma l'artìcol ëd Marchetti a buta fòra tuta n'arserca pontual, doa an dis - dòcument a la man - dàite, spostament, afé, tut lòn ch'a serv a esse pì precis e pì sicur. Preive, professor (a Vërsèj, a Lissandria, a Valensa, a Turin), académich, giacobin, gramàtich e poeta, 'l moncalerèis Carlo Giovanni Casalis a l'ha scrivù an italian e an latin, ma 'dcò an piemontèis: sonèt, epigrama, fàule, la comedia dla "pignata". A sarìa bel cheuje tut ansema. Se - për la literatura - ij temp a fùisso meno gram. ëd Giovanni Tesio - da TORINOsette 'd La Stampa dij 15 ëd fërvé dël 2013

Indietro