Ca 'd poeta

A sarà capitane a tuti, ant ij nòst virolé për ël mond, d'avej gòj d'andé a la serca dle ca e dij pòst djë scritor che pì a l'han carëssane ij pensé e ij sentiment. Anna De Simone, na studiosa squisìa, sensìbila e rafinà, dël sò bsògn ëd "savèj le ca" a l'ha fane un lìber: "Case di poeti" (Mauro Pagliai Editore, 2012, pp. 350, prefassion d'Eraldo Affinati, 23 euro). A son pì 'd 60 ij poeta dont la De Simone a l'é andàita an serca, e an na conta le ca, ij pòst, con na cita antologìa 'd vers, schede biobibliografiche e inmagini. La còsa bela a l'é ch'as lassa nen gené da 'd finagi lenghìstich, e a buta ansema Szymborska, Biagio Marin, Lalla Romano, Amichai, Pavese, Bertolucci, Cucchi, ecc. Con sò sguard ciàir e profond a registra " nel catasto della memoria, case situate ai quattro angoli del pianeta, "costruite" con i mattoni di tante lingue diverse". Chijdun ëd costi mon e cop a parlo la lenga piemontèisa e a son le ca, ij pòst, le paròle, j'itinerari, ij cej, la tèra 'd Bianca Dorato (na "mistica" dij nòsti dì) e 'd Remigio Bertolino. Doi poeta piemontèis ch'a son vagnasse sò pòst ant la stòria dla poesìa e che lë sguard satì d'Anna an restituiss con 'n pì d'anima soasìa. d'Albina Malerba - da TORINOsette 'd La Stampa dij 25 ëd gené dël 2013

Indietro