Armanach dij Brandé

Ij Brandé, «alari», a son j'utiss che ant ël feu, «camino», a giuto a ten-e avisca la fiama. Ma ij piemontèis na frisa 'nlitrà a san che «Ij Brandé» a son 'dcò 'n moviment fondà dël 1927 dal poeta Pinin Pacòt, për l'arnassita dla lenga e dla literatura piemontèisa. «Ij Brandé» a l'é stàit ël giornal ëd costa Companìa, e peui n'armanach, che dal 1960 tuti j'ani a pòrta an giojera n'antologìa soasìa 'd poesìe, 'd pròse e dë studi an piemontèis. Bin se con le fatighe che vivoma ancheuj, a l'é un bon segn che 'dcò për ël 2013 cost lìber pressios a sìa surtì con sò ghëddo sabaud, publicà a l'Ansëgna dij Brandé, suplement ëd «Piemontèis ancheuj», Centro Studi Don Minzoni-Ca dë Studi Pinin Pacòt, soagnà da Michele Bonavero (pp.223, 10 euro, piemonteis.ancheuj@virgilio.it). Tra j'articoj an pias sité col ëd Sergio Gilardino, «Lòn ch'i antendoma për lenga» e ëd Giuseppe Goria un ritrat ëd «Israel Moise Camillo Sacerdote». E peui na mëssonà 'd poesìe: da Aldo Barberis a Antonio Bodrero, da Maria Pia Coda Forno a Camillo Brero a Sergio Notario; e na bela partìa 'd pròse: da Piergiuseppe Menietti a Gianfranco Pavesi, da Giovanni Teti a Silvio Viberti. Vos ëd fiusa, dë speransa e d'angagi da tut ël Piemont. d'Albina Malerba - da TORINOsette ëd La Stampa dij 14 dë dzèmber dël 2012

Indietro