Bon temp e cativ temp a duro mai tuti ij temp

A Turin tuti a conòsso la «Consulta per la Valorizzazione dei Beni Artistici e Culturali di Torino», na bon-a ciambrea d'aziende piemontèise ch'a son butasse ansema për deje na man a nòst patrimòni stòrich, artìstich e coltural ch'a l'ha damanca d'esse soagnà e tnù an gran cont, përchè se a va a rabel a pòrta 'dcò noi tuti a ramengo. Gropand ansema le fòrse la Consulta a l'ha fàit an costi ani tante ròbe bele, butand a l'onor dël mond Cese, Palass, Monument, Musei. A l'é ant na festa al Regio, për marché ij 25 ani d'angage, che 'l Pressident dla Consulta, Lodovico Passerin d'Entrèves, 'dnans a un teatro anval ëd gent, a l'ha sislà sò dëscors fiamengh arciamand un bel proverbi piemontèis, ch'an fa piasì arpijé për la fiusa ch'an mostra: «Bon temp e cativ temp a duro mai tuti ij temp». «La saggezza del vecchio Piemonte - a l'ha comentà 'l Pressident - insegna che le crisi passano» e che «L'identità in tempi così difficili è una formidabile forza per superare una congiuntura negativa e aiuta a guardare avanti con maggiore fiducia». E a l'é nen ëd sòn ch'i l'oma da bzògn ancheuj? Samblé le file con conossensa e cossiensa, fesse pressidi ëd resistensa a la burian-a, goerné la fiusa ant l'avnì. d'Albina Malerba - da TORINOsette ëd La Stampa dij 16 ëd novèmber dël 2012

Indietro