Dario Pasero

Dario Pasero a l'é në studios, un filòlogh, un docent d'Italian e Latin al Liceo classich "Botta" d'Ivreja, bin avosà ant ël mond djë studi sla lenga e la literatura piemontèisa ch'a pùblica sl'arvista «La Slòira» e su vàire d'àutre riviste specialisà. An soa bibliografìa a-i son l'edission critica dle poesìe d'Alfredino e dël teatro d'Armando Mottura, për la Ca dë Studi Piemontèis; con Gianrenzo Clivio e con Giuliano Gasca Queirazza a l'ha colaborà ai volum dla «Letteratura in Piemontese». Ma a l'é scritor ëd sò, an pròsa e an poesìa, an italian, ma dzurtut an lenga piemontèisa, e soe euvre a rapresento un-a dle vos neuve e pì angagià dla leteratura nòsta. An pròsa a l'ha publicà «Sapej» (con Censin Pich), e doi lìber ëd poesìe: «An sla crësta dl'ombra» e «Masche Tropié Bërgamin-e e Spa». E adess fresch dë stampa a-i seurt na neuva racòlta poetica «L'ombra stërmà», për le edission Prova d'autore 'd Catania (pp. 72, euro 12), con la pòstfassion ëd Mario Grasso, ch'a scriv dle poesìe 'd Pasé: «...si vorrebbe saper dire quanta densità, levità e agilità caratterizza il verso di questo poeta che filtra un suo diario affidandolo al magico vocabolario fornito dalla lingua delle madri e dei padri». A son trantesinch poesìe che da l'ombra stërmà a àusso soa vos a l'arserca dj'adoss dla vita, dij sentiment, dl'esse: un viagi ritmà da un lessich soasì, portà sl'abim dl'ànima. «Mia sgnora dij brass candi/ ginoj ëd bianca blëssa sleuja/ spovrin mineuj ch'a marco/ j'ore dl'uissens sërvaj./ Temp ancrosià 'n sl'abim (l' abisso) it seus/sospèis tra pieuva e sfiam», a son ij vers dla poesìa ch'a sara 'l lìber, contradansa 'd cola ch'a lo deurb. Vers s-ciass, ch'a l'han andrinta tuta la coltura, cola classica e filosofica an manera marcà, dlë studios, ch'a fan ëd Pasero un poeta ch'a sa dovré la lenga dla tèra për j'arsivòli pì àut e profond. Satì d'espression e inmagini cissante, veje e neuve ansema, cola 'd Dario Pasero a l’é na lenga poesìa da lese adase: «un succedersi - coma a scriv ancor Mario Grasso - di ricordi e resoconti, un mondo interiore colmo di consapevolezza e di desideri». d'Albina Malerba - da TORINOsette ëd La Stampa dij 18 ëd magg dël 2012

Indietro