Salon dël Lìber 2012

As deurb giòbia 10 ëd magg al Lingòt l'edission ch'a fa 25 dël Salon antërnassional dël lìber Turin, che fin-a al 14 ëd magg a l'é la pì soasìa librerìa dël Piemont e dl'Italia. Vintesinch ani a son na bela marca 'd resistensa, e donca a l'é 'dcò un motiv ëd festa e d'orgheuj, përchè i soma convint che ij lìber an giuto a esse lìber! Ël tema 'd costa edission a l'é «Primavera digitale», vis a dì la rete, la ragnà, internet e tute cole diavolerie ch'an buto an contat con un sempi tich con tut ël mond. La ragnà che quand a bogiava ij sò prim pass a l'avìa fait sentensié ai sòlit nòti, ch'a l'era la fin dle parlade locaj. E anvece tè varda lì a l'ha rapresentà n'ocasion d'arnassensa. E pròpi 'd cost tema «Minoranze linguistiche nell'era digitale» as parlerà an Salon, ant lë spassi Piemonte dël Pad 3, saba 12, a 4 e mesa dël dòp disné, con Esteve Anghilante, Federica Antonietti, Davide Filié, Maurizio Gerotto, Albina Malerba, Guido Ostorero, Barbara Salerno, con ël coordinament ëd Rita Marchiori. Cost debà as podrà 'dcò segue sël sit (www.cr.piemonte.it). Sempe a lë spassi Piemonte i segnaloma la presentassion, lùn-es 14, a 4 e mesa dël dòp disné, dl’antologia «Poeti in piemontese della provincia di Alessandria»: con l'autor Sergio Garuzzo a-i saran Giovanni Tesio, e le vos poetiche 'd Domenico Bisio, Rossella Mainetto, Chacho Marchelli, Arturo Vercellino. E a propòsit dl'importansa dla ragnà për fé conòsse le lenghe e le colture pì cite, ancora al Salon, ant la Sala Arancio (aranda al Pad. 2), duminica 13, a 5 e mesa, presentassion dël «Portale per l'editoria culturale piemontese», con Enrico Eandi, Rolando Picchioni, Giuseppe Pichetto e Rita Marchiori. D'àutre inissiative piemontèise i na daroma 'ncora notissia la vira ch'a-i ven. Coma i disoma sempe, 'l Salon a l'é n'ocasion d'òr për andé a mëssoné tra j'editor pì cit, coj ch'a l'han an catalògo euvre an lenga piemontèisa, che a l'é tant malfé trové ant le giojere dle librerìe. Tra ij peu pré 1200 editor present ant ij diverse padijon dël Lingòt i na segnaloma chijdun che tradissionalment a pùblico 'd lìber an piemontèis: Viglongo (Pad. 1 Stand F 46), Centro Studi Piemontesi/ Ca dë Studi Piemontèis (Pad.2 Stand K 04), Artistica Editrice (Pad.2, L 03), Neos Edizioni (Pad 1, F 22), Graphot (Pad. 1 F 51), Alzani (Pad 2, N 67) Daniela Piazza (Pad 2 G 49), Priuli e Verlucca (Pad 2, L 52), Il Punto-Piemonte in Bancarella (Pad 3, S 14), Interlinea (Pad 2, L 101), Savej (Pad 2, K 03), Araba Fenice (Pad.2, M 64), Claudiana (Pad.2, N 17). Trovene d'àutri a sarà 'l bel dël virolé ant le viassòle dij lìber e dj'editor. d'Albina Malerba - da TORINOsette ëd La Stampa dij 4 ëd magg dël 2012

Indietro