Për la Granda dai brich a la pian-a

Primalpe a l'é na ca editris ëd la Provincia Granda, ch'a l'ha soa sede a Coni, e da 35 ani a pùblica «’L tò Almanach», che coma tanti armanach piemontèis a son 'd lìber satì dë stòrie, d'anformassion, ëd curiosità, 'd poesìe, pròse, e ant un moment dova ij sòld as fan nen la guèra ant le sacòce a son ëdcò në spassi, un leu, un sit për deje vos a scritor che a s'esprimo ant soa lenga dla tèra e dël cheur. Cost dl'«Almanach» a l'é un randevò ch'a s'arneuva tuti j'ani, ma Primalpe a pùblica 'dcò 'd lìber e ancheuj i voroma segnalene un da un catalògo ch'a l'é bin soagnà (info@primalpe.it; tel. 0171/692565): «Për la Granda dai brich a la pian-a» 'd Tòni Tavela (Antonio Tavella), poesìe piemontèise con tradussion an italian e nòte stòriche (pp. 253, euro 22), e na nòta d'achit ëd Censin Pich. A l'é un lìber ch'as segnala për soa originalità. A son poesìe an piemontèis, ma a «conto» an vers 240 Comun-e dla Provincia Granda (a l'ha sernù coj ch'a conto almanch setmila anime, che an tut ël Piemont a son 1117): da Assej (Acceglio) a Votignasch (Vottignasco), a Briaja (Briaglia), Cherasch, Droné, Entraive (Entracque), Frasso (Frassino), Govon, Maren-e, Monfòrt, Roass (Roascio), Sin-i (Sinio), Trèiso, Venasca, e via fòrt. Un viage ant la Granda «an sj'ale - a scriv Pich - sugnante dla poesìa», coma se s-ciairèisso «ant un video imaginari campagne e borgh, castej, cese e badìe, òm ëd pas e 'd guèra e tut lòn ch'a fa dla Granda na tèra dle pì anciarmante dë stòria, d'art e 'd tradission»: na manera «dròla» për fé conòsse 'd pòst che miraco gnanca ij piemontèis a san ch'a-i son. E për ògni poesìa- pais a gionta na cita nòsta stòrica, an italian, fàita sla carzà dij volum «Il Piemonte paese per paese». Tavela, a l'é 'd Racuniss e a l'ha na longa frequentassion con la poesìa e la lenga piemontèisa, n'anteresse e na sensibilità chërsùa con l'amicissia 'd Cichin Paschëtta (ch'a l'ha lassane da pòch) a la Scòla dël grand, grand Barba Tòni Bodrìe e 'd Don Michel Fusé, doi pivò 'd nòsta leteratura dël Neuvsent. E dòp la Granda, la tèra pì davsin al cheur, Tavela a l'ha ant ël tirol le poesìe për tuti j'àutri pais, che la Primalpe a diciara ch'a saran «oggetto di future raccolte, se, come speriamo, i lettori dimostreranno il loro interesse per questo primo volume dedicato al Cuneese». Còsa che noi i s'auguroma da bon, përchè a sarìa bel che minca pais ëd Piemont a l'avijssa sò ritrat an vers: inissiativa unica an tuta Italia. d'Albina Malerba - da TORINOsette ëd La Stampa dij 24 ëd fërvé dël 2012

Indietro