Armanach, calendari, agende

Armanach, calendari, agende, a fan part d'un-a dle pì bele tradission nòste. E quand ancora i l'avìo ant j'euj ël sol dl'istà a son ancaminà a rivé ij calendari dël 2012: 'l prim ch'a l'ha fàit babòja a l'é stàit «Mè Borgh San Pàul. Armanach piemontèis 2012», dl'edisison «Ël Torèt/Monginevro Cultura», con tuti ij Sant ëd la sità e dij pais dël Piemont, 200 proverbi sernù da Sergio Donna e Giuseppe Novajra, ilustrà con 13 fòto dël Borgh San Pàul (për savèjne 'd pì (ufficiostampa@monginevrocultura.net). Subit a roa a l'é rivane «La Memòria dël temp», calendari piemontèis për la sità e ij sitadin publicà da l'editriss Il Punto-Piemonte in bancarella (tel. 011/223.81.12): ij dì, ij mèis e fnestre an piemontèis soagnà da Michele Bonavero, fòto d'antan ëd sità, pais, mësté, piasse, gent, comentà da Bruno Gambarotta, ch'a firma 'dcò l'antrodussion; e le colaborassion ëd Federica Burbatti, Maurizio Ternavasio, Camillo Brero, Daniele Cat Berro, M. Anesi, G. Barberis, Mario Tonini, Claudio Santacroce, Federico Audisio di Somma, che a conto stòrie dròle, curiose, anteressante 'd nòsta tèra e 'd nòsta gent. A-i manca nen la lun-a e soe fasi, soagnà da Walter Ferreri dl'Osservatòri astronòmich ëd Pin. Publicà da Gioventura Piemontèisa e da l'AssOlivero, l'associassion ch'arnòma 'l poeta piemontèis Luigi Olivero, a l'é già surtìa l'Agenda dël Piemont 2012, da n'ideja 'd Massimiliano Pampaloni a l'é cudìa da Roberto J.M. Novero, con la colaborassion ëd Gianalberto Miglio për ij gieu, Giovanni Delfino për le part su Luigi Olivero, Claudio Broglio për ij dissegn, e da Diego Lucco, ch'a l'é 'l vice sìndich ëd La Vila (patria d'Olivé). Na bela agenda con na pàgina antrega për minca dì dl'ani, compagnà da poesìe, pròse an piemontèis, con n'atension special a Luis Olivé; paròle crosià, curiosità, cite nòte 'd gramatica e 'd grafia. E a son publicà le euvre an concors për ël «Luigi Olivero - Agenda del Piemonte», che as peulo votesse con un copon da s-cianché da l'agenda. L'agenda as peul trovesse ant la sede dl'associasison Gioventura Piemontèisa (via San Second 7 bis, Turin), o savèjne 'd pì vardand ij sit (www.assolivero.it, www.gioventurapiemonteisa.net). D'àutre i na daroma notissia prima dl'anviaresse dël 2012, ch'a l'é bele lì sl'ùss. d'Albina Malerba - da TORINOsette ëd La Stampa dij 2 dë dzèmber dël 2011

Indietro