Gualtiero Rizzi

«J'ator a scrivo an sl'eva», parèj, sla pianà d'Eleonora Duse, Gualtiero Rizzi a durbìa un-a dle soe soasìe relassion ai «Rëscontr dë studi sla lenga e la literatura piemontèisa», e as definìa un «Giròlam» dla stòria dël teatro: un ch'a duvìa cuse tòch e tòch dë stòrie, dësnicé 'l cavion përdù, serché, serché, përchè mach fojand ant j'archivi e biblioteche as treuvo ij papé për scrive la stòria. E Rizzi a l'ha lassane na bela partìa dë studi sël teatro piemontèis e an piemontèis. Lìber e studi ch'a son ancora mai stàit superà. E tant material, da vardé, buté a pòst, ricompon-e, a l'é conservà ant l'Archivi dla Ca dë Studi Piemontèis, ansema a 'd lìber amportant për la stòria dël teatro e dël Piemont. Mentre na bon-a part ëd soa biblioteca a l'é stàita a la Comun-a 'd San Bastian da Pò. Gualtiero Rizzi, na a Turin, an via Coni, 'l 30 'd magg dël 1927, a l'é stàit un protagonista 'd teatro, coma ator prima, peui coma regista, a l'ha firmà d'euvre ch'a l'han fàit ël teatro, da l'Alion al Gelindo al Cont Piolèt, al Coucou Bazar ëd Dubuffet; e peui coma Diretor dël Teatro Stàbil e promotor dël Centro Studi Teatro Stabile, quand coste istitussion a bogiavo ij sò prim pass. Coma studios a fasìa part dël Comitato Scientifico dl'arvista "Studi Piemontesi", e për la Ca dë Studi a l'ha publicà la pì part dij sò travaj. Lassà le «sene» a l'é mach pì dedicasse a jë studi: tuti ij sò lìber, j'articoj, le relassion për ij convegn, a son nà a la «Tan-a», al brich dël Colombé 'd San Bastian. Gualtiero Rizzi a l'avìa un seugn: che soa Ca a dventèissa un leu për continué sò nòm, sòi studi…Un seugn che dòp soa mòrt amprovisa, 'l 14 ëd mars dël 2003, a l'é stàit frapà da la realtà dle còse. A pòch pì che eut ani da soa mòrt nen tut dij sò seugn a l'é andà përdù: saba 22 d'otober a 4 ore dël dòp disné la Comun-a 'd San Bastian a j'intìtola la Biblioteca Comunal, con na cerimònia e na manifestassion d'arcòrd (tuti j'amis ëd Gualtiero a son anvità!). Parèj Gualtiero Rizzi a torna a San Bastian, magister e regista, e da cola curva 'd tèra tra pian-a e colin-a con sguard duvèrt a la coron-a 'd nòste montagne, a continuerà a parlene 'd sò amor për ël teatro: l'oma passà 'd bele giornà, e tante àutre as pronto për cit e grand che a intreran an «soa» Biblioteca. d'Albina Malerba - da TORINOsette ëd La Stampa dij 21 d'otóber dël 2011

Indietro