Studi Piemontèis

«Studi Piemontesi» për l'Unità d'Italia. Sent e sinquantane che l'arvista dla Ca dë Studi Piemontèis a onora e compagna an cost agn sì, che për l'arvista a fa quaranta (a son nen pòchi: na festa ant la festa). Con soe bele pagine da tajé (lo disoma sempe: gust che cheidun a meprisa, ma che a rapresento na cita resistenza a la pressa, anvitand a la blëssa 'd toché la pagina col piasì dla consistensa dla carta e con la gòj dij carater e dla grafica: nen còse da pòch). N'arvista bin conossùa, ma ch'a sarìa bel che tuj a conossèisso përchè daré a-i é n'anima ch'a la possa e ch'a la buta minca ses meis a l'onor dël mond (apress dla mòrt ëd Luciano Tamburini, a fé da diretriss Rosanna Roccia, na studiosa bin fongà dël nòst Risorgiment e dl'«Epistolario» 'd Cavour, ch'a l'é stàita për tanti agn diretriss dl'Archive dla sità 'd Turin). Për abonesse (a giuta) a basta telefoné a la Ca dë Studi Piemontèis (011-537486). Nùmer s-ciass e divers cost sì. Ma tut gropà a la stòria dij nòsti sent e sinquant'ane d'Unità. Bej articoj ch'a l'han gnente 'd polémich, ma - al contrari - a conto la veuja 'd dimostré chi j'italian a son nen sempe j'àutri. Argoment dë stòria, d'arte, 'd literatura, lenghistica, stude, nòte, ritrat, arcòrd, inédit, recension, tut a l'ansëgna dël Risorgiment. Ancaminand da Gian Savino Pene Vidari ch'an parla 'd Re Vitòrio ch'a pìa 'l tìtol ëd Re d'Italia. E peui Rosanna Roccia ch'an parla 'd Cavour e dij sò viage. Alda Rossebastiano con un bel artìcol d'onomastica, e via fòrt, da Ester De Fort ch'an parla dla «Mecca d'Italia» ch'a l'é stàita Turin apres dël 48-49, Gianandrea Zanone ch' an parla dël Medio Evo ant ij romans ëd Massimo d'Azeglio, Fabio Prevignano ch'an parla dla presensa d'Alessandro Manzoni ant j'ëscritor piemontèis. Ma peui - ancora - Basso, Bellone, Quaccia con musica, lenga, educassion. Për nen dì 'd Tamburini (a la memòria), Gentile, Cazzola, Satragni Petruzzi, Savio, Goffi, Volpiano, Contaretti, Fiorentino, Guichonnet, Ceresa e Mosca con tante rairità: Austria, Russia, Superga, Italia '61, Govone, Visconti Venosta, Mazzini, j'archive për ël Risorgiment. Satì e galup, un nùmer inteligent e svicio. Un nùmer tut ëd còse e gnente ‘d retòrica. Un nùmer tut da lese e da rumié. ëd Giovanni Tesio - da TORINOsette ëd La Stampa dij 16 dë stèmber dël 2011

Indietro