Ël teatro an piemontèis ant ël 2011

Al teatro an piemontèis (un-a dle manifestassion ëd nòsta lenga ch'a resta viva e popolar, che da sècoj, con àut e bass, con moment ëd glòria e moment pì dël pento, a ten bon e a resta un-a dle vos ch'a l'é mai dëstissasse), da quatòrdes ani la Region Piemont a dedica 'l «Premio per un testo teatrale nelle lingue del Piemonte». Ant costi ani a son afermasse 'd nòm ch'a l'han contribuì nen pòch a serché na neuva arnassita 'd na tradission ch'a l'ha un passà tra ij pì avosà: basta fé ij nòm, tra Eut e Neuvsent, ëd Vittorio Bersezio, Federico Garelli, Giovanni Zoppis, Luigi Pietracqua, Nino Costa, Onorato Castellino, Armando Mottura, e la lista a podrìa continué. Un pass anans a l'é fasse, mersì al Premi, con ij travaj 'd Bianca Dorato, Marco Gosso, Michele Bonavero, Remigio Bertolino, Silvio Viberti, Oscar Barile, Vittorio Sivera, e ambelessì 'dcò i duvrìo buté na bela filonghera 'd nòm (tuti ij test premià o segnalà an cost vir d'ani a son publicà ant na colan-a dla Ca dë Studi Piemontèis). Për fé na riflession slargà su lòn ch'a l'é fasse e lòn ch'a resta da fé (ch'a l'é sempe tant, tròp!), màrtes 14 ëd giugn, a parte da 6 mesa dël dòp disné, a la Casa del Teatro Ragazzi e Giovani 'd Turin, cors Galileo Ferraris, 266, as tnirà n'ancontr, na tàula rionda bin arbiciolùa, sul tema «Dialoghi sul teatro contemporaneo nelle lingue del Piemonte», soagnà da la Region Piemont, da la Fondassion Teatro Ragazzi e Giovani, da la Ca dë Studi Piemontèis e dal Centro Studi Teatro Stabile. Dòp j'introdussion d'Anna Maria Morello për la Region, d'Albina Malerba, Ca dë Studi Piemontèis, 'd Piero Crivellaro, dël Centro Studi Teatro Stabile, 'd Giovanni Moretti, Istituto per i Beni Marionettistici, e 'd Graziano Melano dla Fondassion Teatro Ragazzi, a parleran dl'avnì dël teatro an nòsta lenga, tante vos: da Girolamo Angione a Sergio Ariotti, da Mario Brusa a Marco Grilli, da Massimo Scaglione a Pier Giorgio Gili, a Roberto J.M. Novero, Dario Anghilante, Mauro Arneodo, Ivano Favre, Nicola Gallino, Beppe Rosso, Maurizio Babuin, Gimmi Basilotta e chi dal pùblich a vurrà parlé. Dòp na pàusa për un bicer ansema, a 9 ore as tnirà la festa ‘d premiassion dl'edission 2009 dël Premi, ch’a l’é stàita dedicà a tematiche risorgimentaj e ch'a l'é andait, ex aequo, a «L'antrigh ëd la Marcia dël Rè» 'd Michele Bonavero e Danilo Tacchino, e a «La reusa bianca» 'd Vittorio Sivera. A saran ëdcò nonsià ij premià e segnalà 2010: «Maria Madalen-a» d'Oscar Barile e «Batista Nevacho» 'd Diego Anghilante. La festa a va peui anans con la prima dlë spètacol «L' anciové sota sal» 'd Marco Gobetti, ch'a l'ha avù 'l premi special dla Fondassion Teatro Ragazzi. Soma tuti anvità a costa longa giojosa manifestassion ëd festa për ël teatro piemontèis ch'a varda al doman. Ciamé le anformassion e për prenotesse (ufficio stampa@fondazionetrg.it); tel. 011/197.402.85 (www.casateatroragazzi.it). d'Albina Malerba - da TORINOsette ëd La Stampa dij 10 ëd giugn dël 2011

Indietro