Vestì da Melitar

«Fieuj, partoma sentì le fanfare,/ con trombe ch'a son-o d'antorn,/ sensa gnògne ambrassé vòstra mare,/ peui an marcia al segnal dij tambur./.../ su marcioma, cantoma bej fieuj!/ Rataplan, rataplan, rataplan!/Difesor dla nòstra tèra gnun nemis an fa tramblé/ sentinela a la frontiera fior d'alpin e canonié;/.../ l'é 'l Piemont che a dà a l'Italia soa pì bela gioventù». A son ij primi vers d'un-a dle canson presentà ant ël bel volum «Vestì da Melitar. 1821-1918 dal Risorgimento alla Prima Guerra Mondiale», d'Ettore Galvani publicà da Daniela Piazza Editore (info@danielapiazzaeditore.com, pp.380, ill., cd tacà, €35), come nùmer IV dla serie dij «Canti popolari piemontesi». L'autor, ch'a l'é 'l diretor dl'Associassion Corale Carignanese (ch'a festegia ij sò trant'ani d'atività), con cost travaj as presenta al randevó për ij 150 ani dl'Unità d'Italia «proponendo quest'interessante e ricca raccolta di Canti popolari piemontesi, ampliandone l'analisi, sia da un punto di vista geografico e temporale che linguistico e musicale». Dòp le introdussion, ël lìber, soagnà da cartolin-e d'epoca, fotografìe, document, partiture musicaj, a 'ncamin-a dal «Canto degli esuli piemontesi» dël 1821, a na fornis ël contest stòrich, le diverse version, la mùsica, coma për tute j'àutre canson, e a presenta: l’«Hymnu Sardu Nationale» (1843), con la partitura original; «Oh Piemontesi» (1860), «Vestì da Melitar» (1871), «Il canto del soldato» (1890), «La marcia dij Coscrit piemontèis» (1898), e àutre canson dij coscrit; «Addio madre» (1906); «Oh Gorizia» (1910); «Fuoco e mitragliatrici» (1913); «Da Milano a Genova» (1915); «Ticinesi» (1916); «Son qui di sentinella dalle otto» (1918); «Ël testament dël Marchèis ëd Salusse»; «S'a j'ero tre Alpin - Tre jolì Tambor». Tute le canson, dòp le analisi, ij confront, «stralci di storia», e na pressiosa «Sinossi storica» final, a son eseguìe ant ël cd, ch'a compagna 'l volum, da la Corale Carignanese. Un lìber da lese e da scoté, ch'an fa cadò dj'ùltim «canti popolari epico-lirici a sfondo storico che hanno superato la prova del tempo». Un sécol dë stòria dla nòsta gent travers la canson popolar, studià, rangià, smonùe mersì a la passion e a l'angagi d'Ettore Galvani e dla Corale Carignanese. d'Albina Malerba - da TORINOsette ëd La Stampa dij 27 ëd magg dël 2011

Indietro