Norberto Rosa

Ant la galerìa dë scritor e poeta ch'a son stàit protagonista dël Risorgiment an piemontèis, as peul nen manché d'arcordé Norberto Rosa: poeta vajant che con l'amis Angelo Brofferio, a son le doe vos ch'a l'han pì marcà coj ani dë speranse e d'ideaj fòrt e àut ch'a duvìo porté a la nassita dl'Italia. Soa vita e soa cariera poetica as dësròla tuta an Val Susa: «Procuratore legale a Susa», peui «provveditore agli studi» e «membro della Deputazione provinciale». Coma Broferi, e coma la pì part djë scritor an lenga piemontèisa dl'epoca, dacant a la militansa polìtica a l'ha sempe coltivà la poesìa, ch'a l'ha ancaminà a publiché sël «Parnas piemonteis». Dòp un bel ritrat dedicà a Norberto Rosa da Remo Formica (1929), le citasion ëd Pacòt e ëd Gandolfo, e la publicassion an volum ëd soe euvre, soagnà da Brero (1988), chi a l'ha mej studià soa poesìa an manera filologica a l'é stàit Dario Pasero ant un travaj «Norberto Rosa di Susa: poeta, filosofo, patriota», publicà ant j'At dël VII Rëscontr antërnassional dë studi an sla lenga e la literatura piemontèisa (1991). «Brofferio e Rosa - sitoma da Pasero - si sono formati entrambi sui modelli classici (greco-latini e italiani), ma, mentre il Brofferio spesso tende a prendere in giro questo tipo di cultura… Norberto Rosa invece è sempre serio con la cultura e con i modelli: la sua satira sarà meno immediata…impregnata in modo serio e profondo, di cultura classica, soprattutto latin… Una poesia…che forse non trascina la gente a fare la rivoluzione, ma che certamente serve a far riflettere, ad istruire". La fama 'd Norberto Rosa a l'é sempe stàita un pass andaré a cola dël Broferi: «Angelo Brofferio - a scriv Pacòt - nella inquieta atmosfera politica della capitale…dava impeti di canto ai suoi molteplici sentimenti, Norberto Rosa, nella calma provinciale di Susa, dove l'eco delle battaglie politiche gli giungeva attenuato, aveva agio di limare i suoi versi e di affilare con sapiente ironia la punta delle sue satire». Per saré cost cit ritrat sitoma mach quaiche euvra 'd Rosa: ij poemet «Ij cativ medich», «Le stra 'd fer»; le poesìe soe pì conossùe, «Ij piasì», «Ël ver filòsofo», e la pì epica «L'inno dij Piemontèis», ch'a l'é fin-a arcordà da Claudio Magris ant sò "Microcosmi". A sarìa bel che Vijan-a e Susa ant cost'ani anniversari a s'angageisso për rende omagi a cost poeta che an piemontèis a l'ha daje paròle e pensé al Risorgiment. d'Albina Malerba - da TORINOsette ëd La Stampa dël 1m d'avril dël 2011

Indietro