Enzo Vacca - Un'arpa per Teresa

Enzo Vacca a l'é un dij musicant pì soasì ant ël panorama dla mùsica piemontèisa tradissional pì còlta e rafinà. A l'é bin conossù tra j'apassionà pì che tut përchè a l'é stàit con soa orchestra tra ij protagonista dle Vijà piemontèise (soagnà da la Ca dë Studi Piemontèis na vira a l'ani), ma nen mach. A l'é, darmage a capita sovens, pì valorisà an tèra forestera dova a ten sovens ëd concert, con soa «magica» arpa celtica. A l'ha a sò ativ un prim cd «Evoa!», ch'an segnalava n'arnassensa silensiosa ma satìa dla mùsica piemontèisa për le neuve arserche ant la carzà dla tradission, duvèrta al mond. A seurt adess ël sò neuv cd, «Un'arpa per Teresa» (proget dl'Associassion Concert-Azione, realizà, coma 'l prim, da R&G Zedde, www.zedde.com, con ël sostegn dla Region Piemont e dla Provincia 'd Turin). Coma a nass l'idea 'd cost omagi a la «mitica» Teresa Viarengo, a lo conta con paròle dlicà e poetiche chiel midem ant la plachëtta che a compagna 'l cd. «Quand i l'hai trovà për cas ël cd 'Teresa Viarengo e la ballata popolare in Piemonte'...i l'avìa ancaminà a travajé a l'idèja d'un cd ansima a dij materiaj dël Còro Bajòlese e dël Nigra e i vorìa 'dcò rangé un pàira 'd tòch ëd Teresa e parèj i son butame a scoté con atension... Na rivera an pien-a a l'ha ancaminà a score an mia testa...Tut lòn ch'a l'avìa compagnà mè temp masnà...a arpiava vita e mia arpa as anrichìa 'd na linfa neuva». Costa passion a l'ha portalo a scoté tute le registrassion dël Fond Leydi, goernà an Svissera al Sénter ëd dialetologìa e d'etnografìa ëd Bellinzona, e con cost fardel andrinta al cheur a l'ha podù «pituré» la soa «Teresa». Ansema a Enzo Vacca, vos e arpa, ant ël cd a-i son ij musicant Arianna Ferraudo, vos (vos angelica i giontoma noi); Chiara Carrer, Lorenzo Prelli e Gianluca Allocco, violin; Alessandra Rizzone, Mattia Sismonda, viola; Francesca Funnone, Manuela Mondino e Marco Allocco, violoncel; Giancarlo Zedde, fisa; Alberto Macerata, bass fretless a ses còrde; Martino Maria Vacca, piva irlandeisa; Valerio Franco, pive, pifer; Vik Noello, ògni sòrt ëd tamborn. Ël risultà a l' é un cd ch'a emossion-a fin-a 'nt la miola dj'òss, ch'a comeuv, a argioijss, e a visca tante speranse neuve për chi a-i veul bin al Piemont, al piemontèis, a nòsta poesìa, a nòsta tradission. Ij tòch cantà e sonà a son 13: «Doi Anelin», «Batajin», «La bela va all'Inghilterra», «Tre scolarin», «Baloma!», «La Cecilia» e «Seugn d'un bergé», tradissionaj; «Tango për Teresa» e «Ar mè matòt» d'Enzo Vacca; «Sant'Alessi», «Ra Maddalena», «Miei cari discepoli» e «Ra Passion» d'Aldo Sardo. Tut da scoté! d'Albina Malerba - da TORINOsette ëd La Stampa dij 4 ëd mars dël 2011

Indietro