Mè borgh San Pàul Milaneuvsent

A l'é dedicà a tuti ij resident ëd ier e d'ancheuj dël Borgh San Pàul, un dij quarté ëd Turin pì popolar, dova a son scrivusse amportante pagine dë stòria dël travaj 'd nòsta sità. I parloma dël lìber stòrich-fotogràfich-mùsical ch'as dev a Sergio Donna e Beppe Novajra, «Mè borgh San Pàul Milaneuvsent» ch'a pòrta coma sot-tìtol «Arcòrd ëd fàbrica e 'd vita 'd tut ij di d'un vej quarté turinèis» (Edission Piemonte Cultura, via Costigliole 2, Turin, 2010, pp.105, con cd ëd canson, ufficiostampa@piemontecultura.net). La novità 'd cost travaj a l'é ch'a buta ansemastòria e stòrie, an lenga piemontèisa, tradussion a front an italian, bele fòto d'antan dël borgh ch'a l'ha marcà, coma l'oma dit, la stòria industrial dla sità (e nen mach),compagnà da un cd 'd mùsiche inedite 'd Beppe Novajra, con canson e mùsiche (paròle e spartì) ch'a ten-o bordon a ògni capìtol dël lìber. Sergio Donnaa sta ant ël Borgh fin-a da masnà, a l'é pressident dl'Associassion ëd contrà «Monginevro 2000», e fondator dl'associassion Piemonte Cultura(pressident a l'é Bruno Donna) ch'a l'ha 'l «but ëd cissé e spantié la coltura, la stòria, le tradission» ëd nòsta patria cita. Beppe Novajra a l'é 'd Poirin, e da ani a l'é angagià come cantant e compositor an piemontèis e an italian. Da l'ancontr ëd coste doe sensibilità,doe passion gropà da l'amor për ël piemontèis e për Turin, a l'é anandiasse un sodalissi ch'a l'ha portà a pensé e realisé cost lìber. Eut capìtoj për eut canson: «A sponta torna»: Borgh San Paul con soe bòite, soe boteghe, soe lèje, soe piòle e soe gesie a l'avìa n'anciarm sùtil che artrovoma ant l'ispirassion poetica e un pòch nostalgica dle canson; «Da vigna a vis»: a caval tra ël milaneuvsentedes e 'l milaneuvsentevint ant ël Borgh a «gico da tute part» le fàbriche, as prodovo avion, vagon feroviari, piano, bira, veder e «fin-a jë stamp për ij Diablotin», e pì che tut l'indùstria dj'automòbij, «Diatto e Itala e Lancia, Spa, Chiribiri e peui Ceirano/ a son tute fàbriche ëd marca, marca leon»; «La siren-a dla Lancia», quand che la vita dj'ovrié dël Borgh a l'era scandì dal «son aùss ëd le sirene dle fàbriche, ch'a marco l'ora dël cambi dij torn dël travaj »; «Basin e papin», ël temp dl'amor ant un borgh; «Turin a l'é n'àutra còsa», l'amor për ël borgh e l'amor për la sità; «Al vintun ëd via Cimon», 'l borgh dle piòle, e la piòla con la tòpia, lì an sël canton a l'ombra dla cesa 'd San Bernardin, artreuv ëd pòvrema mirabolante marende sinòire (le paròle 'd costa cason a son gavà da na poesìa 'd Sergio Donna);«Marìa Ausiliatris»: borgh ovrié, borgh ross, ma con tanti oratòri e na mistà 'd laMadòna da preghé e invoché; «Piemont an piemontèis», për finì con n'ariëtta che a carëssa ij giassé 'd nòste montagne. E sla trama 'd tut, come 'n fil d'òr ch'a traversa e a cus le pagine e ij vir dla mùsica, le fotografìe d'antan, ch'a dan profil e mascarìaa le paròle. d'Albina Malerba - da TORINOsette ëd La Stampa dij 18 ëd fërvé dël 2011

Indietro