Angelo Brofferio

«Parloma d'Angelo Brofferio (1802-1866) ch'a së s-ciamava për la vrità Michelangelo. La «glòria» a l’é vnuje da le «Canzoni piemontesi», sò ver monument e testament literari (chi ch'a veul troveje, Viglongo a l'ha fane na bela edission)». Parèj a scrivìa Giovanni Tesio an costa rubrica për un sò ritrat fiamengh d'Angelo Brofferio, che ancheuj i arcordoma coma un dij protagonista dla stagion risorgimental piemontèisa e pi che tut për soe canson. «Canson ch'a smijrìo nasse con l'intension 'd vardé ‘l mond butand-se da part - a son sempe paròle 'd Tesio - con soe macëtte, con soe figurin-e, con soe ironie Angelo Brofferio a l'ha fàit soa part për fé mure na cossiensa nassional». Dòp un cd ëd Gipo Farassino (Region Piemont/Ca dë Studi Piemontèis, 2003), pròpi a deje la sbruvëtta a cost ani dij 150 dl'Unità Nassional, Roberto Balocco a flamba ‘l bòcc con un neuv cd «Guarda ‘l mond e fa 'd canson. Omaggio a Angelo Brofferio» (edission Libreria Piemontese, via San Secondo 11, Turin), coordinament editorial ëd Paolo Sirotto, discografia soagnà da Piergiorgio Balocco, adatament e vos ëd Roberto Balocco, colaborassion musical ëd Raf Cristiano (piano) e Paolo Giolo (violin). Dodes canson da «Cost mond vej» a «Mè ritorn», da «Crudel dëstin» (Dëstin beco-fotù/ it l'has pròpi fam-la grisa/ a s-ciòdme patanù/ sot n'erbo al meis dla bisa,/ da già ch'a t’é vnù ‘l tich / ëd sëmneme dzor d'un brich,/ përchè crudel dëstin/nen feme un ravanin?) a la «Barchëtta», da «Soa ecelensa» a la «Carafin-a rota», un percors amusant e dabon piasos ant ël mond poetich e satirich d'un dij protagonista dël Risorgiment ch'a parlava - smentiomlo nen - an piemontèis. «Nei suoi versi (a scriv Gianrenzo P. Clivio ant ël «Profilo di storia della letteratura in piemontese», Torino, Centro Studi Piemontesi-Ca dë Studi Piemontèis, 2002) é possibile osservare, quasi mese per mese, l'opinione pubblica democratica nell'atto di formarsi di fronte agli avvenimenti d'Italia e d'Europa». E Pinin Pacòt: «Abbiamo l'impressione di immergerci nel fervore della stessa vita, sofferta e vissuta, nel turbinìo delle passioni, dei contrasti, delle speranze e degli entusiasmi, delle delusioni e degli sgomenti, delle sconfitte e delle vittorie di quei nostri antenati» ch'a s'angagiavo për l'unità e l'indipendensa d'Italia e ansema për l'arnovament dla società. Ël cd a l’é compagnà da na bela plachëtta con cita biografìa 'd Broferi e ‘l test an piemontèis dle dodes canson. d'Albina Malerba - da TORINOsette ëd La Stampa dij 21 ëd gené dël 2011

Indietro