Lìber për Natal

An cost fin d'an a son tanti ij lìber e ij cd piemontèis an giojera, bon-e ocasion për ij cadò 'd Natal e ansema n'agiut për le ca editris e j'associassion ch'a son nen arendusse a la mancansa d'ogni sostegn a la lenga piemontèisa. A l’é la pi bela manera 'd nen lassesse tajé la lenga, col d'angagesse con sacrifissi përsonal, sensa lamentesse, darmagi ch'a toca sempe a noi piemontèis desse d'ardriss. Anlora vardì sì 'n prim elenco dle novità, anbaronà 'n pòch tute ansema, ant la fiusa che man a man su minca un-a i torneroma an manera pi aprofondìa. An fa piasi ancaminé costa cita baraonda poetica-literaria-musical, dal lìber ëd Sergio Donna, «Mè borgh San Paul Milaneuvsent» (Edission Piemonte Cultura, 2010, pp.105, con cd ëd canson, ufficiostampa@piemontecultura.net) ch'a pòrta coma sot-tìtol «Arcòrd ëd fàbrica e 'd vita 'd tut ij di d'un vej quarté turinèis». La novità 'd cost travaj a l’é ch'a buta ansema stòria e stòrie, an lenga piemontèisa, tradussion a front an italian, bele fóto d'antan dël borgh ch'a l'ha marcà la stòria industrial dla sità (e nen mach), compagnà da un cd 'd mùsiche inedite 'd Beppe Novajra, con canson e mùsiche ch'a ten-o bordon a ògni capìtol dël lìber. A l’é 'dcò surtì, con bela pontoalità, ‘l glorios «Ij Brandé. Armanach ëd poesìa piemontèisa 2011» (nùmer 52, A l'Ansëgna dij Brandé, suplement ëd «Piemontèis ancheuj», pp. 95), l'armanach lìterari dla «Ca dë Studi Pinin Pacòt», soagnà da Michel dij Bonavé (Michele Bonavero); poesìe, pròse, articoj dij grand dël passà e dj'autor d'ancheuj. Roberto Balocco, un dij pi vajant e angagià cantautor piemontèis, a fà seurte për le edission dla Libreria Piemontese Editrice (via San Secondo 11, Turin, coordinament editorial ëd Paolo Sirotto), un Cd fiamengh, «Guarda ‘l mond e fà 'd canson. Omaggio a Angelo Brofferio», giusta a la vigilia dël 150 dl'Unità a l’é franch amportant ch'a ven-o arcordà ij nòsti scritor piemontèis! Për sté an mùsica, segnaloma, ma come i l'oma dit, i l'avroma ocasion ëd parlene da bin, ‘l neuv Cd d'Enzo Vacca, «Un'arpa për Teresa», dedicà a la Teresa Viarengo 'd Nigra, realisà da l'associassion «ConcertAzione» e da l'editor Zedde (www.zedde.com): un cd dë siensa e 'd cheur «për conté nòste rèis». Il Punto-Piemonte in Bancarella a l'ha, coma da tradission, publicà ‘l bel calendari piemontèis «La memòria dël termp 2011» (www.piemonteinbancarella.it). Tanti bogianen ch'a bogio! d'Albina Malerba - TORINOsette dla Stampa dël 10 dë dzèmber dël 2010

Indietro