Beppe Sinchetto

Sarà përchè la poesìa a l’é «n'agiut për la vita» ant la babilònia ch'an anciòrgnia ‘l cheur e j'euj tuti di; sarà përchè ij cors ëd lenga piemontèisa che an j'ùltimi des ani a son moltiplicasse ant tut ël teritòri regional e donca sempe pi 'd pèrson-e a van alfabetisandse 'dcò an piemontèis, vis a dì ch'a-i é sempe pi 'd gent (për boneur!, contra tute le strìe dël malauguri) ch'a amprend a scrivlo; ch'a sia coma as veul, as treuvo sempe pi d'annamorà dla poesìa. E 'd lìber ëd poesìe as na pùblico sempe 'd pi. E sòn a l’é na ròba bela, përchè mersì a la poesìa as torno a butesse an gir paròle, sentiment, arcòrd, sensassion, che a l'avrìo nen vos, nen pòst an cost mond sempe pi balòss. Poesìa come agiut a la vita, poesìa ch'a l’é «'n basin tra 'nnamorà,/... un respir d'aria përfumà,/ un moment ëd vita da arcordé», a l’é cola 'd Beppe Sinchetto che a né smon un bel bochèt ëd poesìe ant ël sò scond lìber «Tersa stagion» (Moncalé, Iniziative Editoriali, pp. 112, euro 12). L'ingegné Sinchetto (laureà an Ingegneria Chimica al Poli 'd Turin «a pieni voti»), dòp ani 'd travaj passà an tut ël mond, adess as peul concede ‘l lusso 'd coltivé soe passion: marce an montagna e për ij senté 'd soa colin-a moncalerèisa, scrive conte, fàule, e argalesse con la poesìa. Ant ël lìber, ch'a l'ha na presentassion ëd Sergio Nòtario, «Gavoma la flussionera» (cò a sarà mai sta flussionera?...a l’é na barëtta, na scuffia bondosa, che i podrìo tradùe: «passamontagna»), na prefassion ëd Piera Rossetti Fogliano, e na postfassion 'd Fermino Brazzale, i trovoma pi 'd sinquanta poesìe. Vers ch'an conto l'amor, la natura, la montagna, moment ëd vita, j'afet dla ca e dla famija, con emossion, con calor, ma 'dcò con ironìa: «Vorèjsse bin»: «A veul dì pijesse na caplin-a, /viravoltà toa testa a bamblin-a...»; «Natura Magistra»: «Fé ‘l pare, a dìo, a-i é pa 'd professor,/ nopà varda la natura bin da davzin,/ it peule amprende da sò candor, /at da 'd consèj 'nt ij moment ëd sagrin...». Citassion a cas, ch'an fan capì coma Beppe Sinchetto a l'ha savù deje sens e valor a la «Tersa stagion» ëd soa vita. d'Albina Malerba - dal Vënner ëd La Stampa dij 12 ëd novèmber dël 2010

Indietro