Barbafiòre - Domenico Boetti

«Sono pensieri fulminanti quelli di Barbafiòre, a volte irriguardosi, sovente pungenti, ma sempre capaci di far riflettere dopo aver suscitato un sorriso. Quando li ho letti per la prima volta sono rimasto colpito dalla sua capacità di cogliere nel segno con sagacia e finezza: ho voluto andare a Mondovì a conoscere di persona quest'uomo e la mia stima per lui è aumentata dopo averlo colto nel suo vissuto quotidiano». Chi a scriv coste paròle a l’é Enzo Bianchi, prior ëd Bòse, un-a dle vos pi conossùe dël nòst temp. La ròba bela për noi ch'i l'oma la passion për la poesìa e për la poesìa an piemontèis, a l’é ch'a jë scriva ancaminand soa sclinta «Nota introduttiva» a la neuva edission (la prima a l’é dël 1996) dla racòlta 'd poesìe «Piccola Bibbia» 'd Barbafiòre, nòm ëd piuma 'd Domenico Boetti (I quaderni di Provincia Granda, Gli spigolatori, 2010, pp.56, con an cuvertin-a un pastel ëd Teresita Terreno). Barbafiòre-Meco Boetti a l’é 'd Mondvì, e a l’é un djë scritor an piemontèis che a fan dël monregalèis un dij «distretti» pi amportant e mossant dla leteratura an lenga piemontèisa: a parte da Carlo Baretti, për rivé a Carlo Regis, a Remigio Bertolino e a Barbafiòre, ch'as segnala për ij sò vers curt, sangiant, pontù; vers coma fusëtte, coma flece sij pensé dla vita. Tanti a son ij lìber ëd Barbafiòre, ma soa consacrassion a ven con «Viragalèt», publicà da la Ca dë Studi Piemontèis dël 1997. Sguard (ant la bela cadensa monregalèisa), costi dla «Bibia», 'd riflession irònica e tant uman-a su 'd tema tant pi àut ëd lòn che j'òmini a peulo vardé: «Coma Eva a j'ha convinciù Adam: Buta pura che on campa fòra/ëdnoa ëndroma pagroma l'afit/ ma se na vòta j'avroma piasì/ ëd mangé pom/ is no gavroma la veuja»; «Il ritorno del figliol prodigo: Finì la festa/ a l'indoman/ o j'é scapaje 'd ca/ ël frel pi vej»; «Apocalisse: Tut ës bordel/ për smorté la lus»; «L'inizio dell'autobiografia di Dio: Son partì/dal gnente». Vers ch'an dan në s-cionf ëd rije...ma peui an giuto a pensé. Poeta fin, sensibil, original, Barbafiòre-Meco Boetti, annamorà dla poesìa. d'Albina Malerba - dal Vënner ëd La Stampa dij 29 d'otober dël 2010

Indietro