Menu an piemontèis

Gnun-e tëmme ch'i veubio fé 'd nòst cantonòt na gesiòta dij racomandà. E gnanca ch'i veubio butesse a fé ij cacam dël bel mangé piemontèis (tutun a lo san fin-a le pere che ‘l Piemont, capìtol mangiarin, a l'ha gnente d'amprende da gnun e miraco cheicòs da mosté). Gnente 'd tut sòn, ma cheicòs ch'a j'ësmìa, përchè as trata 'd dì ambelessì 'd n'inissiativa ch'a l’é nen la prima ma ch'a merita d'esse arcordà. Ala finitiva as trata 'd sòn. A Turin, via Galliari, àngol via Ormea (pròpe d'ësbiess al Colege Universitare) a-i é 'n cit òsto ch'a së s-ciama «L'angolo di parìn» (tradussion: Ël canton ëd parin) ch'a l’é nen mach un pòst ëd galuparìe, ma 'n pòst dova ancapita 'd lese 'n bel menu tut an piemontèis, ma 'n piemontèis flambà ‘l bòcc, scrit coma as deuv, ciadlà coma a l’é bel che na lenga a ven-a tratà: nen coma "vaca" - a l'avrìo dit ij mè vej pa tròp fin - ma pitòst come na bela fiëttin-a con le tërse o ij rissolin. A sarà che a fòrsa 'd fé ‘l piemontèis a pija l'ande giust, a sarà che tanti cors (organisà con competensa) ancamin-o a buté sò git, ma sto menu a l'ha colpime përchè a l'ha nen ij boro che d'àutre menu parèj a manco nen d'avèj (ideje bele ch'a van cudìe come ch'as deuv). E alora andoma a fé festa a j'ordeuvra: lard condì con amel, sautissa crua, lenga al verd, frità a la menta 'd Pancalé, povron an bagna càuda, siolòt a l'asil balsàmich, barice al tango (vis a dì ancioe al verd), tomin con erbe sërvaje. E peuj le tante tome ('d Bra, 'd Coni, 'd Macagn) e la sieta con surtiment ëd salam e la sieta con surtiment ëd formagg ëd crava. E ij prim: torte salà, pastiss ëd pan cheuit, tajarin, ris e cossòt, marzan-e a la padan-a. E le pitanse: sautissa brasà a la barbera, quajëttin-e 'd vitel a l'erbe servaje, cunij rustì a la salvia, ròst e sotfilèt, flan e carn crua, povronà e verdure dl'òrt, cossòt an carpion e fnoj grijà. Për funi coj doss, le torte, la crema cheuita, le salade 'd fruta e via fòrt. Na filonghera d'emossion (an cusin-a Màssim dij Bonavé, an sala la bela grassia 'd soa sgnora). Emossion dle còse galupe ma 'dcò dle paròle giuste. Via Galliari 29/f. Un canton da ten-e a ment. ëd Giovanni Tesio - dal Vënner ëd La Stampa dij 17 dë stèmber dël 2010

Indietro