Paròle ëd Piemont

Da vàire ani ël Consèj Regional dël Piemont a pùblica na cita colanin-a ch'a và sota l'ansëgna 'd «Tascabili di Palazzo Lascaris». Sacociàbij i dirìo an bon piemontèis (lìber cit, ch'a stan an sacòcia), e Palass Lascaris a l'é la sede dël Consèj, nòst parlament, an via Alfieri, da nen confonde con la Gionta, ‘l govern, ch'a l’é an piassa Castel. J’argoment tratà dai 36 tìtoj fin-a adess surtì, a son ij pi divers, na ricordoma chijdun: «Piemontesi nel mondo», «Gli ecomusei in Piemonte», «Bicentenario di Brofferio e di Siccardi», «Torino 2006», «Luigi Palma di Cesnola», «Torino, 2 aprile 1860: inaugurazione dël Parlamento a Palazzo Madama», e via fòrt. Ant ël 2001 a j'era surtìjne un dedicà a la lenga piemontèisa e a le minoranse lenghìstiche, «Il patrimonio linguistico dël Piemonte», ch'a l'avìa na bela antrodussion dël professor Giuliano Gasca Queirazza, che tuti i ricordoma con tanta afession a n'ani da soa dipartìa. A des ani da col sacociàbil ël Consèj a torna sl'argoment con la publicassion ëd «Parole di Piemonte», ‘l n. 37, ch'a cheuj ij test surtì ant ël 2009 sl'arvista dla Region Piemont «Notizie», ant na rubrica con cost midem tìtol. Për la lenga piemontèisa ij test a son stàit soagnà da la Ca dë Studi Piemontèis e a riguardo, declinà 'nt le quat stagion, na nòta sël Piemontèis con na bibliografia essensial për chi a veul avsinesse a la lenga e a la leteratura piemontèisa; un tòch sla «Canzone popolare», con an antologia Baron Litron (e la tradussion an italian); n'arcòrd ëd Tavo Burat, mancà a dzèmber 2009, l'invern dla tèra e l'invern dij cheur piemontèis; un ritrat dël poeta che ant ël Neuvsent a l'ha daje ‘l vòl a la poesìa an piemontèis, Pinin Pacòt, e 'dcò la poesia «Primavera: Deurb la fnestra, poeta, che ‘l sol së spatara an toa stansa/ a-i nassrà na speransa, minca un seugn che at ancanta», n'anvit a la speransa. J'àutri test a riguardo 'l Francprovençal, soagnà da l'associassion Effepi; l'Occitan soagnà da la Chambra d'oc, e ‘l Walser dal Centro Studi Rimella. Quaranta paginëtte 'n tut ma bin satìe, ch'a son come un bochèt ëd nòsta tèra, për sente ‘l profum dle parole 'd Piemont. La realisassion a l’é dla Diression Comunicassion Istitussional dla Ciambrea Regional (Diretor Rita Marchiori), Setor Anformassion (responsabil Marina Ottavi, Gianni Boffa, Federica Calosso). Un proget ch'a sarìa tant bel a andèissa anans, e a l’é lòn ch'i s'auguroma an salutandse për l'istà. d'Albina Malerba - dal Vënner ëd La Stampa dij 9 ëd luj dël 2010

Indietro