La tesi ëd Sergi Garuss

Vàire vòte 'dcò da coste pagine i l'oma sercà d'anvité l'Università 'd ca nòstra a dé 'd tes, a fé fé d'arserche sla leteratura piemontèisa. E dabon s'a-i fusso nen staje ij Rëscontr antërnassionaj sla Lenga e la Literatura Piemontèisa, soagnà dal prof. Gianrenzo P. Clivio, che për tanti ani a l’han portà si an Piemont tanti studios da Università forestere, se Chiel an prima përson-a a l'avèissa nen firmà prima 'd lassene tròp prest col «Profilo di Storia della Letteratura in Piemontese»; ij travaj portà anans, an quarant'ani 'd soa atività, da la Ca dë Studi Piemontèis; o da le tesi sul teatro piemontèis dàite ant j'ani andaré da Massimo Scaglione, e pòche àutre ecession (penso a 'd tesi dël prof. Marco Cerniti; e a pòche àutri, almeno sël vërsant dla leteratura, përchè për jë studi lenghìstich, toponomastica, onomastica, la scòla dël prof. Giuliano Gasca Queirazza a l'ha lassà soa marca ciàira e fosonanta!) ancheuj i sarìo al pian dij babi. A l'è për sòn ch'i segnaloma e i salutoma con gòj la tesi 'd Sergio Garuzzo, «Poeti in piemontese della provincia di Alessandria» (Università dël Piemonte Orientale A. Avogadro-Facoltà di Lettere e Filosofia-Corso di làurea in Lettere, aA 2008/2009, relator prof. Giovanni Tesio). Ant le quasi 400 pagine dla tesi, i trovoma, dòp l'introdussion general, pi 'd tranta poeta dla provinsa 'd Lissandria, con notissie biografiche e cita antologia poetica, con tradussion an italian. Dacant a 'd nòm conossù, coma col d'Umberto Luigi Ronco, 'd Giovanni Ranetti, 'd Cesare Vincobrio, Cino Chiodo, Teresio Malpassuto, a-i ven fora na bela coalera d'espression e d'esperiense (Crispino Jachino, Gian Maria Piccone, CioD, Andrea Canestri, José Bernaldotti, Enrico Reposi, Sandro Locardi, Gianni Pozzi, Gianni Regalzi, Rossana Ivaldi, Domenico Bisio, Ginevra Bocchio, Lorenzo Magrassi....), tute vos che a concoro a dé n'inmagine dla provincia 'd Lissandria e dël Monfrà linsandrin, che chijche Gariboja a vorerìa scassé fora dal Piemont. Anvece a-i ven a gala na provincia viva, mossanta, ch'a peul avèj so póst ant la stòria dla leteratura an piemontèis. Tanti a pontifico, ma pòchi a studio, e dabon pòche a fan studié. L'augure a l'è che costa tesi a peussa trové n'editor ch'a na fassa na publicassion da buté a disposission ëd tuti. Antant còpia dla Tesi as peul consultesse a la Biblioteca dla Ca dë Studi Piemontèis. d'Albina Malerba - dal Vënner ëd La Stampa dij 11 ëd giugn dël 2010

Indietro