Salon dël lìber ch’a fa 23

«La memòria svelà» a l’é ‘l tema dël Salon antërnassional dël lìber ch'a conta 23 primavere e che da ier fin-a al 17 ëd magg a da an gage ‘l Lingòt ai lìber. Coma i l'oma dit vàire vire, ‘l Salon a l’é n'ocasion galupa për andé a la sèrca dj'editor ch'a buto an catalogo euvre an lenga piemontèisa, e che nen sempe a l’é facil trové ant le giojere dle librerìe, gavà 'd cole doe o tre «specialisà». A va armarcà che 'dcò st'ani, ‘l Consèj Regional dël Piemont ant sò Stand S52-T51 Pavajon 3, a da vos a le «Parole di Piemonte» (bel tìtol che an gir a l’é già stàit copià!), butand a disposission në spassi për la lenga piemontèisa e j'àutre minoranse lenghìstiche dël teritòri. An piassëtta «Parole di Piemonte», drinta lë Stand dël Consèj, vënner 14, a 6 ore dël dòp disné, la Ca dë Studi Piemontèis a presenta l'esperiensa che da na desen-a d'ani a pòrta anans con la Region Piemont e che a va sota ‘l titòl «Prima Mignin» (a propòsit ëd memòria e d'avnì!), a l'ansëgna «Piccoli piemontesi crescono»: con j'insegnant Anna Maria Borlengo, Davide Damilano e Caterina Testa, coordinà da Giulia Pennaroli e da chi a scriv, e le masnà dla Scòla Materna 'd Valle Talloria (Circol didàtich ëd Diano d'Alba) ch'a porteran canson e filastròcole an piemontèis. Për saré a-i sarà la projession dël cd «Le paròle, ij pòst, la stòria» 'd Daniela Rissone. A 8 e mesa le marionëtte d'Augusto Grilli a presento për cit e grand «Turin ch'a bogia». Saba 15, a l'istessa ora, a toca al francoprovenzale, con la conferensa «Salviamo la memoria e il futuro» con Guido Ostorero e Domenico Cabodi, e con cant e baj an costuma dle Valade; e a 8 e mesa a torno le marionëtte 'd Grilli. Duminica 16, sempe a 6 ore, ij Walser, con la conferensa 'd Pier Giorgio Vasina, «I bambini: il futuro della memoria», sislà dal Consert dla Corale Cantar Storie 'd Domodossola, direta da Luca Bonavia; a 8 e mesa le marionëtte 'd Grilli; e për finì lùn-es 17, a 6 ore, a toca a j'Ocitan, con Franco Bronzat, «La letteratura in lingua d'oc nelle Valli Occitane in Piemonte», letura 'd poesìe con Dario Anghilante e mùsiche con Marco Ghezzo, Manuela Almonte e Peyre Anghilante. A 8 e mesa as sara barca e buratin con «Il Natale di Gelindo» rapresentà da le marionëtte d'Augusto Grilli. Ma ‘l Salon a l’é pi che d'àutr festa dij lìber e anlora i segnaloma almanch chijdun dj'editor ch'a pùblico ëd lìber an piemontèis: ancaminand da Viglongo (Pad. 1 Stand E 46), Centro Studi Piemontesi/Ca dë Studi Piemontèis (Pad.2 Stand J04), Artistica Editrice (Pad.2, dacant a la Ca dë Studi), Neos Edizioni, Graphot (Pad. 1 Stand E 52), Alzani, Daniela Piazza, Priuli e Verlucca, Il Punto-Piemonte in Bancarella (Pad.3 Stand S09), Interlinea /Pad.3 Stand R 71). E tanti d'àutri che, con gambe bon-e e vista longa, ventrà andé a dësnicé viroland për tut ël Salon. d'Albina Malerba - dal Vënner ëd La Stampa dij 14 ëd magg dël 2010

Indietro