Piero Montanaro

«Canté mia tèra» a l’é ël tìtol dl'ùltim cd d'un cantautor, stesan doc coma as definiss con orgheuj, che da tanti ani a l’é angagià për la canson piemontèisa, e bele se a dis con na ponta 'd polémica che «cantand piemontèis, as viv pà da cantant», a la fin ëd la fera a continua a canté sò Piemont an piemontèis. Parloma 'd Piero Montanaro, che a va anans a scrive, incide, fé spetàcoj. Serte vire, a dis Montanaro, «mi sento come un panda, animale in estinzione, che, nonostante tutto contìnua a scrivere canzoni e cantare in piemontese». Cost neuv cd a conten 9 canson an piemontèis e 2 an italian, ma con tematica regìonal. Ij test a son tuti 'd Montanaro con vàire colaborassion mùsicaj: P. Graglia, L. Ravasio, B. Conti, G. Rigo, S. Negroni, P. Zanocco, A. Bertoni, Remipas e d'àutri. Canson coma cit racont, o testimonianse 'd memòria: «Mi masnà», arcòrd 'd vita dël pais, cit cheur ficà ant ël cheur; «J'amis, j'amis», sentiment fort dl'amicissia, dj'amis che ant j'ani as perdo; «Sté sì con ti», la «gozzaniana» gòj d'andé ansema a la morosa a fé marenda ant ij pra; «Dnans ch'a fassa neuit», ch'a riassum ‘l messagi pi fòrt dël cd «parloma e cantona 'n piemontèis»; «Sta vita ch'a sfianca», l'infansia al pais, an biciclëtta sensa man sël manubrio...e peui la vita ch'a ranca via j'entusiasm, le veuje, le passion; «A la fin ëd la fera»...delusion, amarëssa, dificoltà... Na sitassion a part a merita la canson ch'a l’é dventà 'n clàssich «Andoma a vié», ant ël cd presentà compagna mach da la froja ëd Juan Fabio Caminos, registrà dal viv al Teatro Sociedad Cosmopolita dë Soccorros Mutuos 'd Devoto, ant ocasion dìj consert tnù da Montanaro an gir për l'Argentin-a. «Quand le neuit a son pi longhe/ domje 'nsema na cantà./A l’é bel podèj trovesse/tuti ansem come na vòlta/a fé na bela vijà». L'edission ëd «Canté mia tèra» a 1'é 'd Canterò Edizioni Musicali e discogràfiche, via dë Regibus 10 an Ast (nùmer ëd tel. 0141/27.25.24; piero@pieromontanaro.com). Për risparmié carta, piante e dné ij test a compagno nen ël cd, ma as treuvo, con la tradussion an italian, sël sit (www.pieromontanaro.com). L'auguri cb'i voroma fé a Piero Montanaro e a noi, a l’é, coma già l'oma avù manera dë scrive, col ëd desse da fé tuti ansema, ognidun doa a peul, përchè 'dcò ij nòsti cantant piemontèis a ven-o valorisà, deje na man, ciameje a fé 'd consert ëdcò a Turin... a venta bogé...prima ch'as fassa neuit.. Alé! d'Albina Malerba - dal Vënner ëd La Stampa dij 16 d'avril dël 2010

Indietro