Vijà piemontèisa

Ancaminà quasi për scomëssa ant lë dzèmber dël 1998, al Teatro Carignan, la «Vijà piemontèisa» a l'ha arzistù e a l’é dventà un randevò ch'a fa tradission, che la gent a speta. Na vijà, na veglia, 'd Natal con le vos dla poesìa che da sécoj a parla an lenga piemontèisa, ch'a veul 'dcò esse na festa dla speransa, di'arcòrd, dla continuità e dla arnassensa, sicur che le paròle a son nen mach segn o fià, ma a l'han n'anima e na stòria antica, ch'a fongo soe rèis ant ël cheur pi leugn dl'esistensa uman-a. Parèj 'dcò për saré ansema ‘l 2009 e fesse j'auguri, la Vijà «poesia e mùsica për Natal» as fa (come ant j'ùltim doi ani) al Teatro Collegio San Giuseppe (via Andrea Dona 18, Turin), duminica 20 dë dzèmber, a 5 ore dël dòp disné. La novità a l’é che për la prima vòlta as fa 'd duminica e ant ël tard dòp disné, anvece che la sèira dòp sin-a. Come sempe a l’é soagnà e organisà da la Ca dë Studi Piemontèis e da la Region Piemont, e ant ël cors dle spetàcol as tnirà la cerimonia ëd premiassion dël concors regional «Premio për un testo teatrale nelle lingue del Piemonte»: segnalà Romano Fea (con «La tragedia dël Re Vitòrio Medeo II») e (a la memòria, përchè mancà pòch dòp la decission dla Giuria) Marco Gosso (con la comedia «Pais an guèra»). Con j'ator Mario Brusa, Fulvia Roggero, Bruno Anselmino e Rosalba Dongiovanni (un mersì për ël coordinament a Massimo Scaglione), la Vijà as deurb con n'omagi poetich e mùsical a Pare Giuliano Gasca Queirazza s.j. (mai mancà a na vijà an costi dodes ani!), e peui alé con le poesie: da Broferi a Calvo a Isler, da Pacòt a Motura a Nicola, da Pich a Bianca Dorato, Bertolino, Viriglio, Barba Tòni, Arrigo Frusta, Barbafióre, Nino Costa, Elisa Revelli, Gianrenzo Clivio, Brero, Oreste Pasolo, Amìlcare Solferini, Olivero, Alfonso Ferrero, Leone Fino, Tavo Burat, Alex, Guido Gozzano...e tanti d'àutri che con ij sò vers an faran rije, an faran sugné, an faran sente la gòj dël Natal ch'a s'ausin-a e che as vivrà pi ancreus con le poesìe finaj 'd Giorgio Calcagno (un po' an piemontèis, an latin, an italian, e an d'àutre lenghe) e 'd Renzo Gandolfo. A la poesìa as alterna e s'antërsa la mùsica con ël «Quintetto Enzo Vacca»: sota la diression d'Enzo Vacca (arpa celtica), Arianna Ferrando (vos, chi a l'ha sentila na vòta as la desmentia nen!), Chiara Carrer (violin), Alessandra Rizzone (viòla), Francesca Funnone (violoncel). La Vijà a l’é gratis, e as peul intresse fin-a ch'a-i son ëd pòst an Teatro. Për d'àutre anformassion basta telefoné al nùmer 011/53.74.86 (info@studipiemontesi.it). Orare d'ufisse. d'Albina Malerba - dal Vënner ëd La Stampa dël 18 dë dzèmber dël 2009

Indietro