Piemont ant ël mond

Mersì al «Master in Cultura e patrimonio storico-linguistico dël Piemonte për la formazione degli insegnanti», masentà da la professorëssa Alda Rossebastiano dl'Università 'd Turin, tenusse dal 2005 an Argentin-a (an colaborassion con l'Università 'd Còrdoba) e an Brasil (con l'Università 'd Vitòria), con la tua e l'agiut dla Region Piemont, a son an costi di a Turin un bel Strop ëd fieuj e 'd fije, e 'dcò 'd madamin e monsù un pòch pi grandinòt, che da cole lession a l'han artrovà orgheuj 'd soa tèra, e a l'han vorsù vnì a deje realtà e geografia ai pòst che për lor a l'ero pi na toponomastica dël cheur e dla memòria. Për sostansié costa esperiensa a son stàit publicà doi lìber: un për l’Argentin-a (e i l'oma già parlane su coste pagine) e un ch'a l’é surtì pròpi an ocasion dla visita dje student dël Master, dedicà a «Il Vecchio Piemonte nel nuovo mondo. Parole e immagini dal Brasile», soagnà, coma l'àutr, da Alda Rossebastiano për j'edission lissandrin-e Dell'Orso (pp.197, euro 18): artìcoj d'Elena Papa, 'd Daniela Cacia, 'd Fabia Gatti, 'd Joelma Cellin, 'd Gianni Perona d'Anna Ferrari, e doi cotribù d'onomastica dla curatris. Moment motobin fosonant për ij lìber sl'emigrassion perché a son surtì a roa àutre publicassion che sitoma ma che miraco a varrà la pen-a ëd parlene pi an creus: un bel travaj 'd Giancarlo Libert, che dòp «Astigiani nella Pampa», an fa cadò dlë studi «L'emigrazione piemontese nel mondo. Una storia millenaria» (giutà da la Region Piemont për le edission Aquattro, pp.301, euro 24); un viage ant le rason stòriche dl'emigrassion piemontèisa, an Argentin-a, ma 'dcò an Messich, Egit, Australia, ecc., con na bela galerìa dë stòrie: coma cola d'Eugenia Pallera e 'l Ristorant Sardi's ëd New York; o cola 'd Pare Renato Cavallo, salesian da Neive a Mendoza. Con na quaranten-a 'd pagine d'«Indice» dij nòm e dij pòst, e la lista dij binelagi tra pais piemontèis e pais ant ël mond. Edcò frèsch d'inciòstr ël volum ëd Mariagrazia Alliaudi e Silvio Genero, «Da Cercenasco nel mondo. Storie di famiglie emigrate in Texas, California, Argentina e Francia» (edission dla Region Piemont-Comun-a 'd Cercenasch, Marco Valerio editor, pp.670, euro 24): n'arserca ant j'archivi comunaj, ch'a l'ha porta a slarghé j'orizont sul mond. Oltra le stòrie dle famije, a j'arcòrd, a le fóto, motobin pressiose, pòst për pòst, le liste djë sbarch ant ij pais d'emigrassion, con date, notissie biogràfiche, spostament, matrimòni, ecc. Na minera d'anformassion ch'a l'ha na valensa general e nen mach për Cercenasch. Alegà un cd con «Alberi genealogici, fotografie e cartografia». Un model për ógni pais piemontèis ch'a veuja rende omagi, e miraco giustissia, a la memòria dla soa gent emigrà. Lìber ch'a son, ansema d'àutri surtì an costi ani, stòria nòsta, 'd col Piemont ch'a viv ant un'àuta riva, dëdlà dl'Oceano. d'Albina Malerba - dal Vënner ëd La Stampa dël 20 ëd novèmber dël 2009

Indietro