Studi Piemontesi

A l'é surtìe ant l'istà «Studi Piemontesi», l'arvista dla Ca dë Studi Piemontèis ch'a fa tranteut agn ëd vita (për n'arvista 'd coltura a l'é pa pòch). Con soe bele pagine da tajé (cita digression: gust che cheidun a meprisa, përchè a riess nen a capì coma an cost temp 'd còse ch'a viagio an pressa as peussa 'ncora insiste a 'ndé pase e adase; ebin le pagine a l'é bel tajessie pròpi për sòn, për dì che na resistensa cita as peul cudisse 'dcò 'n costa manera ch'a gropa blëssa dla pagina e piasì 'd tochene la consistensa, dë spetene e, squasi, nasene 'l sens). Nùmer rich e divers. Argoment dë storia, d'arte, 'd literatura, studi, nòte, ritrat, arcòrd, inédit, recension segnalassion, un notissiari ch'an conta dle tante inissiative pijà da la Ca dë Studi, ma 'dcò da tante d'àute associassion o përson-e ch'a travajo an nòsta region. N'arvista bin conossùa, ma ch'a sarìa bel che tuj a conossèisso përchè daré a-i é n'anima ch'a la possa e ch'a la buta minca ses mèis a l'onor dël mond (ël diretor a l'é Luciano Tamburini, a deje d'agiut Albina Malerba e Giulia Pennaroli con la colaborassion d'un fiamengh grup dë studios 'd diverse materie). Andreina Griseri a parla 'd Roberto Gabetti e Aimaro Isola, Valentina Vignola a parla 'd Fenoglio, Alessandro Zussini 'd Piero Giacosa, 'l frel 'd Pin. E peuj Piccat, Caldera, Moiso, Arecco, Corrado e San Martino, Satragni Petruzzi, Pozzo, Bodrato, Perin, Ghirardello, Sasso, Griva, Savio, Albera, Reineri, Gentile, Piatti: ch'an parlo 'd Tommaso III ëd Salusse, 'd De Amicis, 'd Giovanni Plana, 'd Salgari, 'd Davide Bertolotti, 'd Gian Luigi Marianini e 'd tanti d'àutri përsonage e argoment. Ma la fior - la perla - a l'é l'ùltim artìcol ëd Pare Gasca Queirazza, ch'a l'ha lassane a luj, ma che con cost artìcol a l'ha lassane un-a dle soe lession pì pressiose. Lession magistral su - se voroma - na cita còsa, ma sislà come mach në studios dla soa taja a podìa fé. L'argoment a l'é 'l salut «cerea». Vàire vòte soma ciamasse da doa a ven. Ambelessì a-i é tut spiegà an numera fiamenga. Chi ch'a veul ausinesse a l'ha mach da pié 'n man l'arvista e lese 'l prim tìtol. Da pagina 3 a pagina 9. Ses pagine 'd sapiensa. E 'd gòj. ëd Giovanni Tesio - dal Vënner ëd La Stampa dël 30 d'otóber dël 2009

Indietro