| Armando Mottura |
|
«...La mia casòta bianca,/ col tòch ëd tèra nèira,/ la tòpia, ‘l fi, na banca,/ la fontanin-a, l'èira,// la vos ëd mia fomnin-a,/ la fila giàuna 'd cosse,/ ij përro, la galin-a../ e tante reuse rosse! ». A son ij vers ëd na bela poesia d'Armando Mottura, un poeta e scritor bin conossù tra jë studios e j'apassionà 'd piemontèis. Nà a Turin ‘l 22 d'agost dël 1905, Motura a l'è stàit con Pacòt Nicola, Brero, Spaldo e àutri amis tra ij fondator, e un-a dle vos pi vive e soasìe, dla Companìa dij Brandé. Tute le antologìe un pòch coma as deuv ëd leteratura a ricòrdo l'euvra 'd cost poeta, a ancaminé da la prima racòlta «Reuse rosse» dël 1947, a «Paisagi 'd Val Susa» (1949), da «La patria cita» (1959), a «...e adess pòvr òm?» (1969), fin-a a la racòlta antològica «Vita stòria bela» soagnà dël 1973 da Renzo Gandolfo për la Ca dë Studi Piemontèis, a la racòlta surtìa dòp soa mòrt (Turin, 29 d'otober 1976) cudìa da Camillo Brero, «Le rime d'Oulx e àutre poesìe» (Piemonte in Bancarella, 1987). Ma oltra che poeta Armando Mottura a l'è stàit un dij pi amportant e fosonant autor për ël teatro piemontèis, darmage an costi ùltim ani pòch arcordà. A riparé a costa pòca atension, dòp j'ani dij sucess an sle sene, a riva adess l'edission crìtica 'd soe comedie soagnà pròpi coma as deuv da Dario Pasero (critich che sempe pi as segnala për l'angage filològich dij sò travaj), e con na presentassion ëd Giovanni Moretti (dl'Istituto për i Beni Marionettistici e il Teatro Popolare, che 'd Motura a goerna l'archivi). Ël volum, sota ‘l tìtol «Teatro» (Turin, La Slòira-Ca dë Studi Piemontèis, 2009, pp. 560, €20), a pùblica, con tradussion an italian, notissie dj'edission e dle rapresentassion, 7 comedie 'd Motura: «Rossòt» (1931), «L'amor dij giovo» (1932), «...e la rova a l'è ancantasse» (1950), «Creature» (1955), «Peul sempre desse» (1956), «Quarantottenne bella presenza», «Girò Fantasia»" (1960). Un corpus straordinari 'd test butà fmalment a disposission dij letor, ma 'dcò dle tante Companìe teatraj che soens a l'han malfé a trové 'd test da buté an sena. Antant i lesoma ant na nòta 'd Pasero che a sta 'ncora continuand a travajè...përchè a-i son d'àutre pièces tra le carte Motura da buté a pòst, studié e publiché ant n'àutr liber. d'Albina Malerba - dal Vënner ëd La Stampa dël 25 dë stèmber dël 2009 |
|
Indietro |