J'amis. Poesia an musica

A l’é pen-a surtije un cd, «J'amis», poesìe dë scritor piemontèis d'ancheuj butà 'n mùsica da Maurizio Verna e cantà da Claudio Bovo. L'idea e 'l proget a son ëd Dario Pasero: «Un Cd neuv ëd mùsica piemontèisa o un cd ëd mùsica piemontèisa neuva?» Nò a scriv Pasero ant l'achit. «Pitòst na mùsica ant la carzà dël tentativ fàit apopré ant j'ani Sinquanta da 'd musicista parèj 'd Vicenzo Davico e Luis Perrachio che...a l'han butà an mùsica 'd poeta piemontèis...parèj 'd Nino Costa, Pacòt, Olivé, Daverio...». A l’é na bela tradission e la lenga piemontèisa a na manca pròpe nen. Donca an costa carzà, ant la carzà dla canson d'autor ëd j'ani Sessanta e Stanta, as presenta cost Cd an manera originala ant ël panorama dla mùsica piemontèisa d'ancheuj. Le poesìe sernùe a son cole 'd Giovanni Morello, «Ël sìngher», «J'amis» e «Bariera»; 'd Sergio Bellino, «Cand ch'i sia vej», «Sla broa», «Anvìa a la prima»; d'Enrico Gullino, «Che tempi» e «Na pugnà 'd vers»; ëd Luciano Origlia, «Me segn», e «Ex voto»; e 'd Dario Pasero, «Piassa Castel-Contrà 'd Pò» e «Shakti». Tuti scritor an piemontèis an piòta, già consacrà da j'edission dla colan-a 'd poesìa 'd «La slòira» d'Ivrèja, soagnà da Pasero midem, l'associassion coltural ch'a realisa 'dcò cost Cd neuv ant tuti ij sens, ch'a ven a fortì n'aleansa tra scritor e musicista motobin viva ant la coltura dij Brandé, che an costi ùltim ani a l'era andàita përdendse. Ansema a Maurizio Verna ch'a son-a la Chitara, la froja, classica e acustica, chitara archtop, e a Claudio Bovo, vos, a son-o «J'amis» Roberto Bongianino, fisa e bandoneon, Zita Petho, violin, Sonia Cestonaro, oboe, Pederico Puppi, violoncel, Paolo Guercio, piano e tastiere, Alfonso Domenici, sax, Massimo Caserio, sitar ; Christine «Naif» Herin, vos. Realisà da RotellaNera produssion, 'l Cd a deurb na stagion neuva për la mùsica piemontèisa, vardand nen mach a la tradission, ma a tuta la coltura musical dël Neuvsent, e a lo fa con paròle an piemontèis. Na scomëssa ant l'avnì 'd nòsta lenga. Tute le poesìe a son publicà ant la plachëtta ch'a compagna 'l Cd, con test italian a front. Miraco a sarà nen tant bin fé trovelo ant ij sòlit canaj 'd distribussion musical. Pròpe vera che le ròbe bele a venta andeje a serché (vardé ij sit: http://www.claudiobovo.it opurament http://maurizìoverna.it). d'Albina Malerba - dal Vënner ëd La Stampa dël 5 ëd giugn dël 2009

Indietro