Angelo Manzone

Donato Bosca - i veuj ringrassielo dabon për avèjme cissà a deje da ment - a l'ha fame conòsse n'autor langhèt ch'a l’é pròpe piasume. Mi an prinsipe l'hai fàit na cita resistensa. Ma peui - come fass pì o meno sempe - son dime: ma se chiel sì a fùissa pròpe bon? E alora son butame li e l'hai scotà ‘l cd che Bosca a l'ha passame: «Angelo Manzone, cantautore di Langa» (për catelo, ciamé D.M.C. Sas, Turin, via Front, 13, nùmer ëd tel. 011-397.81.18, nùmer ëd fax: 011-397.84.36). Angelo Manzone a l’é mancà già da 'n pò, ma soa vos e ij sò test a resto lì, 'n pò canson, un pò poesìa, poesìa-canson, canson-poesìa. «Ma doman», «Nade grame», «Cha cha cha glottologico», «Ij sant», «Na tinota», «Cicin», «Bep Marlòt», «Bagna cauda», «Ra glissa», «En formag special», «Luna pina». Canson o test sensa mùsica, a-i é lì 'ndrinta 'n mond ch'a ven fòra come na ven-a d'or. N'aria 'd mincadì, pòche gnògne, còse rustiche, n'aria paisan-a e na gran veuja ‘d dì. Nà a La Mora dël '37, Manzone a l'era trasferisse a Turin (a-i é 'dcò ant ël cd na canson ch'a s'ëntìtola «Naufragio a Moncalé»), a l'avìa fàit le scòle àute (Liceo e Università), peui a l'era tornà a La Mora, a l'avia pijà an man l'Oberge dl'Angel e a la fin a l'era artirasse a vive ant soa borgà, ch'a pòrta 'l nòm ëd sò nòm. Ant soe canson a-i é na frisa 'd Gipo, ma le pì bele a son bin soe, tute soe: a l'era stàit bon ëd toché soe còrde pì përfonde. Sentiment e comossion (tnùa bin polida), na ven-a 'd malinconìa, ma 'dcò d'ironìa a fé pendant. Na bela mës-cetta ch'a fa 'd Manzone 'n cantautor pien d'arsonanse e - djomlo subit - 'd sitassion. A sarìa n'eror pensé che Manzone a fùissa n'autor sensa leture. Tut'àut. As sent bin ant ël tlé 'd soe conte e 'd soe canson (o dle soe poesìe) la sèrnia dle paròle giuste, sempie, dle rime ch'a coro sensa gena, e tut ansema n'aria 'd vrità ch'a la ced nen a la fin d'un mond tut d'andrinta, combin ch'a smija fàit 'd còse e 'd përson-e. Na realtà ch'as fa poesìa e basta. Na cita rivelassion. ëd Giovanni Tesio - dal Vënner ëd La Stampa dël 29 ëd magg dël 2009

Indietro