Ezio Girardi

Menestrel ch'a canta: «D'amor a conterà le stòrie/fra dame e sivalié...». L'Associassion «Amici della cultura piemontese» 'd Pianëssa da vàire ani a pòrta anans un pressios travaj d'arserca për la mùsica e le canson dël Piemont, dai temp pì lontan ai nòsti di, e parèj adess an propon n'àutr bel cd «Come na faula. Musica e canti dël Piemonte», antërpretà da Ezio Girardi e dal còro «Arsivòli» (për riveje basta scrive (amiciculturapiemonte@tiscali.it) opurament vardé (www.webalice.it/arsivoli). Ël disco a l’é compagnà da un grassios librèt che oltre ai test dle canson an piemontèis con la tradussion an italian, a pùblica na nòta sla mùsica e la canson popolar an Piemont, e a ilustra jë strument, «l'organetto diatonico», la ghironda, la froja, la fluta, 'l violin, 'l dulcimer, dovrà për compagné le canson popolar. Ant ël cd i podoma scoté 16 canson, con neuv arangiament: dai tradissionaj Michel Tross (Bon-a sèira Michel Tross, le ninsòle a son pa nos...), la Mare Crudela (Oh mare mia 'm veuj maridé...), Teresin-a (E Teresin-a na va 'n cassin- a...), Il genovese (Bel genovèis a veul maridesse,..), la Bargera e 'l luv (La bargera larga jj moton,..), la Mulinera (La mulinera l'ha 'rnovà la vesta...), Ij moleta (Oh mama mia ij moleta s'a calo...), la Polajera (Vëdèisse la polajera, quand che chila la va al mërcà...), la Tabachin-a (Tabachin-a pòrta pa 'l capel..,); a neuve propòste soagnà dal maestro Ezio Girardi, coma 'l Menestrel, Fantasìa medieval, Come na fàula, Avril, ecc. Për giuté chi a l'avèissa veuja d'angagesse a soné e canté, ‘l lìber a pùblica le partiture 'd quasi tuti ij test dël cd (gavà da cole già inserìe ant ël «Nuovo canzoniere piemontese», sempe soagnà da l'Associassion). Cant popolar «letti e cercati da pòchi studiosi - a dis Girardi ant la presentassion - si è voluto portarli a conoscenza di un pubblico più ampio, proponendoli cantati con nuovi arrangiamenti», con ël but «di suscitare interesse për la musica tradizionale e spronare gli animi alla rivalutazione di un patrimonio meraviglioso, che appartiene non solo alla nostra regione, ma all'umanità». d'Albina Malerba - dal Vënner ëd La Stampa dël 10 d'avril dël 2009

Indietro