Dódes agn ëd cors ëd piemontèis

A fa dodes. Dodes agn che la Ca dë Studi Piemontèis a organisa për cont ëd la Region Piemont (Assessore a la Coltura) ij cors che st'agn a së s-ciamo «Il piemontese. Gli scrittori, le opere, i luoghi, le parole, l'avvenire» (diretriss Albina Malerba con Davide Damilano e Giulia Pennaroli). La scomëssa a l'é nen mach ëd ten-e da cont lò ch'an ven da na richëssa che tròp soens a l'é 'ncora considerà da gnente (a fa pa basta fin...) o da pòch (al temp dl'ingleis, a va pa basta bin...) ma 'dcò 'd dimostré che scrive 'n piemontèis a l'é nen, coma serti a continuo a chërde, impossibil o mal fé. Tut àutr. Tersa, ma nen ultima rason, cola 'd corisponde a la lege regional dël 10 d'avril 1990 (la lege 26), nà për la tua, la valorisassion e la promossion dl'original patrimòni lenghìstich dël Piemont. Pi 'd sinch mila iscrit an ondes agn d'atività a dimostro che la veuja 'd chérde a cheicòs ch'a va pi 'n là 'd lò ch'a smìa a prima vista a l'é nen pòca. Lòn ch'a cissa la Ca dë Studi a continué. Nen mach. Lòn ch'a cissa a 'nventesse 'd còse neuve. Tant për dì, ij cors a giro: ij capleu 'd provincia e tanti d'àutri pòst ch'a son Àich, Bra, Carmagnòla, Sirié, Ivreja, Cavalion, Moncalé, Varal, Savian, Susa e da st'agn sì Cental, Gal, Grinsane, Montà. Duvert a tuti e completament a gràtis, a son cors fàit d'eut lession ëd doe ore prun, con na tranten-a 'd professor angagià (da Giuliano Gasca Queirazza a Tavo Burat, da Remigio Bertolino a Gianfranco Gribàud, da Censin Pich a Sergio Gilardino, da Gianni Davico a Giovanni Cerutti, a Roberto Cognazzo a Enzo Vacca) për mostré a scrive, lese, parlé 'l piemontèis, a conòsse la lenga, la literatura, la mùsica piemontèisa. Le lession a son pen-a ancaminasse a Coni, Cental e Cavalion (ultima lession a Versèj 'l 4 ëd giugn). A Turin a ancamin-o 'l 25 ëd mars (la sede a l'é la Biblioteca Civica 'd Villa Amoretti, an cors Orbassan, da sinch a set ore apress disné). Për iscrivse a basta telefoné a la Ca dë Studi Piemontèis (011/53.74.86; info@studipiemontesi.it) opurament presentesse a le lession e fesse scrive lì. ëd Giovanni Tesio - dal Vënner ëd La Stampa dël 6 ëd mars dël 2009

Indietro