Vijà piemontèisa 2008

Gelindo a torna e la Vijà Piemontèisa che la Ca dë Studi Piemontèis a organisa ansema a la Region Piemont (Assessorà a la Coltura, Setor Patrimonio Linguistico) a torna 'dcò chila, mersì a l'angage d'Albina Malerba, 'd Massimo Scaglione e d'Enzo Vacca. Lùn-es 15 dë dzèmber al Teatro Collegio San Giusepppe ('l San Gip!) ëd via Andrea Doria 18 a s'ancamin-a a set ore 'd sèira con la sirimònia 'd premiassion d'un test teatral për le lenghe dël Piemont (ij segnalà a son Michele Bonavero e Gualtiero Marello). Vin d'onor a set e mesa e peuj, a 'n quart a neuv, via a la Vjjà con j'ator Bruno Anselmino, Rosalba Dongiovanni, Mario Brusa, Fulvia Roggero, Marco Voerzio e con la Piccola orchestra d'Enzo Vacca (con Enzo Vacca, Arianna Ferrando, Chiara Carrer, Lorenzo Prelli, Alessandro Rizzone, Francesca Punnone, Manuela Mondino). Musica, canson e poesìa as daran la vos për na manifestassion ch'a l'é dventà n'apontament da neo manché. Nen mach për chi a s'arconòss ant la tradission piemontèisa, ma për tuti coj ch'a l'han a cheur la difèisa nen bòrgna d'un vive comun, sivil, gropà a le reis ('d tuj, bin intèis). Gnente 'd mej për sòn (per fé Natal ansema) che fé canté la poesìa. Poesìa che st'agn sì a l'é organisà a blòch. Për ancaminé le favole mora) (da Calvo a Nino Costa) e Pinòcchio an piemontèis (ëd Guido Griva), ch'a l'é nen poesìa, ma ch'a l'é come s'a lo fùissa. E peuj la «Malinconia» (da Carlo Baretti a Gianrenzo Clivio, passand për Cocito, Olivero e Dumini Badalin), le «Poesìe d'amor» (da Brofferio a Dario Pasero, passand për Fasolo, Pacòt, Nicola, Spaldo, Bertodatti, Bertolino e Pich), le «Allegorie» (da Barba Tòni a Barbafiore, passand për Botto, Regis, Isler, Castaidi, Gallina, Comino), 'l «Sentiment religios» (da Armando Mottura a Tavo Burat, passand për Bianca Dorato e Milo Bré). Ma, për finì, le «Natalizie» (da Fulberto Alarni a Elisa Revelli Tomatis, da Daverio a Carlottina Rocco e Anita Giraudi) e - come tuti j'agn - la poesìa 'd Natal ëd Renzo Gandolfo. Bon Natal (ëd poesia) a tuti ij nòsti letor. ëd Giovanni Tesio - dal Vënner ëd La Stampa dël 12 dë dzèmber dël 2008

Indietro