La legenda ëd Mayno della Spinetta

Për pòch che un a mastìa ëd literatura piemontèisa a conòss ij nòm ëd Pinin Pacòt e d'Armando Motura, doi dij fondator dij «Brandé». Pacòt (1899-1964) a l'é 'l pivò, la fior, ël cheur dl'arnovament, dal 1927, dla poesìa e dla leteratura an lenga piemontèisa; e Motura (1905-1976), a l'é stàit un dij pì fiusà e angagià ant la Companìa. L'archivi 'd Motura e bon-a part dij sò manoscrit a son conservà a l'Istituto për i Beni Marionettistici e il Teatro Popolare. Da cost archivi a seurt e a ven adess publicà a l'ansëgna dla ca editris «Seb27» (www.seb27.it), ël soget për ël cine «Maino della Spinetta», scrivù a quatr man da Motura e Pacòt, an italian. ël lìber, soagnà da Giovanni Moretti, che con Alfonso Cipolla a l'é l'anima dl'Istituto për i Beni Marionettistici e il Teatro Popolare, a pòrta 'l tìtol «Mayno, il brigante della Spinetta. Intorno a un soggetto cinematografico di Armando Mottura e Pinin Pacòt» (pp. 124, ?12,50). Prima dël test e dòp na bela introdussion ëd Giovanni Moretti e 'd na poesìa an piemontèis ëd Motura «Alarme», a publica jë studi ëd Silvia Corsi, «il soggetto di Armando Mottura e Pinin Pacòt a confronto col mito Mayno»; 'd Franco Prono, «Maino della Spinetta, un soggetto cinematografico»; 'd Franco Castelli «Mayno della Spinetta: un brigante fra storia e leggenda». N'euvra amportanta perché a pòrta un contribù neuv a la presensa ant la coltura piemontèisa 'd Motura e Pacòt, e a l'ha 'l mérit d'arnové l'anteresse su un-a figura coma Mayno dla «Fraschetta», che për soe imprèise ant j'ani dl'invasion ëd Napoleon a l'é dventà na legenda 'd libertà e 'd resistensa, e che ant j'ani a l'ha ispirà, romans, test teatraj, studi, coma as peul bin vëdde da la nòta bibliografica soagnà da Castelli. Chissà mai che 'l travaj artrovà 'd Pacòt e Motura a peussa nen cissé quàich regista 'd cinema. d'Albina Malerba - dal Vënner ëd La Stampa dël 7 ëd novèmber dël 2008

Indietro